«Փորձագետները շարունակում են քննարկել ռուսական նոր «ռազմական վարկի» նշանակությունն ու նպատակները: Հիշեցնենք՝ հոկտեմբերի 12-ին ՀՀ կառավարությունը հաստատել է ՌԴ-ից նոր «ռազմական վարկ» վերցնելու համաձայնագրի նախագիծը, ըստ որի՝ ՀՀ-ին արտոնյալ պայմաններով կտրամադրվի 100 միլիոն դոլարի վարկ՝ ՌԴ-ից ժամանակակից սպառազինություն և զինտեխնիկա գնելու նպատակով:
ՀՀ-ն վարկն օգտագործելու է 2018- 2022 թթ., իսկ վարկի մարումը պետք է կատարվի 2023 թվականից՝ տարեկան 3 տոկոս տոկոսադրույքով: Ռազմատեխնիկական համագործակցությանը վերաբերող նախորդ վարկային համաձայնագիրը (200 միլիոն դոլարի չափով) ՀՀ-ի և ՌԴ-ի միջև ստորագրվել էր 2015թ. հունիսին:
Հայաստանը բալանսի խնդիր չունի: Ի՞նչ խնդիրներ է հայկական ԶՈւ-ն լուծելու ռուսական զենքի նոր խմբաքանակի միջոցով, և նկատի ունենալով նույն ՌԴ-ից և մի քանի այլ երկրներից միլիարդավոր դոլարների արժողության զենքի ձեռքբերումը Ադրբեջանի կողմից՝ որքանո՞վ է վարկային նոր համաձայնագիրը նպաստելու Հայաստանի և Ադրբեջանի միջև ռազմական ուժերի հավասարակշռության վերականգնմանը կամ պահպանմանը: Մեկնաբանելով հարցը՝ քաղաքագետ Հրանտ Մելիք-Շահնազարյանը մեզ հետ զրույցում նշեց, որ Հայաստանն իր առջև խնդիր չի դրել՝ վերականգնելու ռազմական ուժերի հավասարակշռությունը Ադրբեջանի հետ:
«Մենք ունենք անհրաժեշտ բոլոր զինատեսակներն ու ներուժը Ադրբեջանի հնարավոր ռազմական ագրեսիան զսպելու համար: Դրա ապացույցներից մեկն էլ ապրիլյան իրադարձություններն էին. տեսանք, որ Արցախի Զինված ուժերը կարողացան արժանի հակահարված տալ և հետ մղել հակառակորդին: Մյուս կողմից էլ՝ հասկանալի է, որ ընդհանուր առմամբ սպառնալիքները Հարավային Կովկասում շատ են և դրանք չեն բխում միայն Ադրբեջանից կամ Ադրբեջանի իշխանություններից: Ե՛վ մեր, և՛ հարակից տարածաշրջաններում այնպիսի գործընթացներ են տեղի ունենում, որոնք ստիպում են շատ ավելի աչալուրջ և պատրաստ լինել հնարավոր սպառնալիքներին: Ինչ վերաբերում է հարցին, թե ինչ սպառազինություն Հայաստանը կարող է ձեռք բերել նոր վարկային համաձայնագրով, ապա որևէ տվյալ կոնկրետ զինատեսակների մասին առայժմ չկա, բայց պարզ է, որ 100 միլիոն դոլարը լուրջ ձեռքբերումների հնարավորություն է տալիս: Հայկական կողմը կարող է գնել և՛ պաշտպանական, և՛ հարձակողական զինատեսակներ»,- մեկնաբանեց քաղաքագետը:
Մեր զրուցակցի գնահատմամբ՝ ռազմաքաղաքական առումով զենքի նոր խմբաքանակի ձեռքբերման նպատակն առաջին հերթին թուրք-ադրբեջանական ագրեսիան զսպելն է, իսկ ընդհանուր առմամբ այս վարկը հայկական կողմին անհրաժեշտ է անվտանգության գործոնը Հարավային Կովկասում ամրապնդելու և ավելի կայուն դարձնելու համար: Մելիք-Շահնազարյանի կարծիքով՝ մենք չպետք է բավարարվենք այն մտքով, որ ՀՀ-ն ավելի էժան գներով է զենք ստանում ՌԴ-ից, քան Ադրբեջանը, այլ փորձենք հասնել նրան, որ սահմանափակվի ռուսական զենքի մատակարարումը Ադրբեջանին, և բացի այդ՝ Ադրբեջանում չկարծեն, որ ՌԴ-ից զենք ստանալով՝ ստանում են նաև հարձակվելու իրավունք»,-գրում է թերթը:
Նյութն ամբողջությամբ կարդացեք թերթի այսօրվա համարում:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել