Համաշխարհային շոու-բիզնեսում ընդունված պրակտիկա է, երբ հայտնիները համացանցում ստեղծում են իրենց երեխաների էջերը, տեղադրում նրանց լուսանկարներն ու տեսանյութերը, ստանում մեծ թվով հավանումներ՝ այդպիսով հրապարակայնացնելով նրանց կյանքը: Հայ հայտնիներն էլ հետ չեն մնացել այս առումով: Նրանք էլ են տեղայնացրել միջազգային փորձը: Լավ է դա, թե վատ, հարցի հակառակ կողմն է: Նրանցից շատերի երեխաները դեռ ծնված օրվանից ունեն իրենց էջերը: Մի մասն անձամբ է վարում իր էջը, մյուսների էջերն էլ ծնողներն են կառավարում: Ներկայացնում ենք աստղային այն երեխաներին, որոնք ամենաակտիվն են Ինստագրամում:
Դերասան, պրոդյուսեր Արմեն Պետրոսյանի՝ Մենչի, դուստրը՝ Էլինան, նույնպես ակտիվ է համացանցում: Ինստագրամում նրա հետևորդների թիվ հասնում է մոտ 23 հազարի: Էլինան վերջերս սկսել է նաև վիդեոբլոգ վարել, որտեղ ցույց է տալիս իրենց տունը, դպրոցը, ժամանցը։ 13-ամյա աղջնակը սիրում է դիտել վիդեոբլոգներ, այդ իսկ պատճառով որոշել է ունենալ իրենը։ Էլինան հենց իր անունն է տվել վիդեոբլոգին՝ «Էլինա Պետրոսյան բլոգ»: Աղջկան հետևում են ոչ միայն ընկերուհիները, այլև անծանոթ աղջիկներ։ Էլինան երազում է հայտնի բլոգեր և դիզայներ դառնալու մասին։
Հրանտ Թոխատյանի ու Լուիզա Ներսիսյանի փոքրիկ Լիլիթիկն արդեն օրիորդիկ է: Ծնողները դստեր դաստիարակության հարցում չեն թերանում, չնայած որ երկուսն էլ մասնագիտական բուռն գործունեությամբ են զբաղված: Լիլիթիկը մեծանում է խելացի, շնորհալի, դաստիարակված ու նաև գեղեցիկ: Աղջկա շնորհքն իսկապես ակներև է: Նա հրաշալի հաղորդավարուհի է ու դատելով նրա սոցէջի լուսանկարներից՝ նաև սելֆիի իսկական վարպետ: Նա ունի շուրջ 3100 հետևորդ:
Սիրված ու ճանաչված փոքրիկ երգչուհի Նանուլը միշտ է հանրության ուշադրության կենտրոնում: Այդքան շատ սիրելու հետ մեկտեղ նրան ամենաշատն են քննարկում ու քննադատում: Մարդկանց կարծիքով՝ Նանուլն այն փոքրիկներից է, ով մանկությունը վայելեց շպարված, բարձրակրունկ կոշիկներով ու մշտապես հարդարված մազերով: Վիկա Մարտիրոսյանի դուստրն այն քչերից է, ով ակտիվ վարում է իր ինստագրամյան էջը։ Հետևորդների թիվը հասնում է շուրջ 42 հազարի: Աղջիկը հաճախ է հրապարակում լուսանկարներ առօրյա կյանքից ու համերգներից, ինչպես նաև հոլովակներ, որտեղ պարում է: Դժվար է գուշակել՝ Նանուլը կգնա մոր ճանապարհով՝ դառնալով պարուհի, թե կընտրի երգարվեստը, կամ էլ երկուսը միասին:
Հայկոյի և Անահիտ Սիմոնյանի որդին` 6-ամյա Արմանը, շարունակում է այն փոքրիկների շարքը, ովքեր իրենց անձնական էջն ունեն համացանցում: Արմանի ինստագրամյան հետևորդների թիվը շուրջ 5500 է: Արմանն առանձնանում է իր նախանձելի զսպվածությամբ ու համեստությամբ, նաև՝ գեղեցիկ հագուկապով: Նշենք, որ որդու իմիջով Անահիտն անձամբ է զբաղվում:
Երգիչ Վաչե Ամարյանի որդին, ով լույս աշխարհ է եկել ընդամենն ամիսներ առաջ, արդեն Ինստագրամի էջ ունի, որտեղ հրապարակվում են փոքրիկի լուսանկարներն ու տեսանյութեր: Թմբլիկ Ալեքսի լուսանկարները զարդարում են նաև նրա աստղային հայրիկի էջերը սոցիալական ցանցերում: Փոքրիկն ունի շուրջ 11 հազար հետևորդ:
