Panorama.am-ը գրում է.
Թուրք հաքերներից կազմված ASLAN NAFERLER TIM (A.N.T.) խմբավորումը կոտրել է Ֆրանսիայում Հայաստանի զբոսաշրջության գրասենյակի կայքէջը և տեղադրել իրենց էլեկտրոնային պաստառը։ Այս մասին հայտնում են Ֆրանսիայում Հայաստանի զբոսաշրջության Գրասենյակից:
«Կիրակի, սեպտեմբերի 24 առավոտյան թուրք հաքերներից կազմված ASLAN NAFERLER խմբավորումը կոտրել է destination-armenie.fr ֆրանսալեզու կայքը, որը հանդիսանաում է Ֆրանսիայում և ֆրանկոֆոն երկրներում Հայաստանի Զբոսաշրջության Գրասենյակի կայքէջը:
Նույն օրը, թուրք հաքերներից կազմված նույն խմբավորումը կոտրել է նաև Ֆրանսիայում Հայաստանի Առևտրաարդյունաբերական Պալատի կայքէջը www.cciarmenie.fr.
Բարեբախտաբար, աշխատակիցների զգոնության և արդյունավետ աշխատանքի շնորհիվ հնարավոր է եղել կարճ ժամանակում վերականգնել կայքէջերի բնականոն աշխատատաանքը, չհաշված որոշ անսարքությունների, որոնք կվերականգնվեն սեղմ ժամկետներում:
Այս երկու կազմակերպությունները, որոնք ֆրանսիայում գործում են 2015 թվականից ի վեր, Հայաստանը ներկայացնող կառույցներ են։
