«Երեկ ռուսական, ապա ադրբեջանական մամուլում էյֆորիկ վիճակ էր՝ լուրեր էին հրապարակվում այն մասին, որ Հայաստանի արտգործնախարար Էդվարդ Նալբանդյանը Հայաստան-Սփյուռք ֆորումի ժամանակ հայտարարել է, որ Ադրբեջանի հետ քննարկում են մի շարք տարածքների հանձնման հարցը՝ «այն տարածքների, որոնք անվտանգության տեսակետից սպառնալիք չեն ստեղծի ոչ Ղարաբաղի, ոչ հարցի կարգավորման համար»: Իսկ եթե դրան ավելացնենք նաև Նալբանդյանի ելույթից մի քանի հատված, իրավիճակն ավելի կհստակվի: Ասենք՝ այս մասը. «Հայաստանը բազմիցս հայտարարել է, որ ընդունում է եռանախագահների այս առաջարկությունները, այս սկզբունքները՝ որպես բանակցությունների հիմք»: Կամ «Բանակցային գործընթացի շուրջ մեր մոտեցումները համահունչ են միջազգային հանրության, եռանախագահների դիրքորոշմանը»: Եվս մեկ հատված. «Ամեն անգամ, երբ եռանախագահները հանդիպումների արդյունքներով հայտարարություն են տարածում, ջրի երես է դուրս գալիս, թե որքան իրականությունից հեռու են ադրբեջանական կեղծիքները, և որքան համահունչ են միջազգային հանրության մոտեցումները մեր տեսակետների հետ»: Սակայն ընդամենը օրեր առաջ ամերիկյան համանախագահ Հոգլանդի հայտարարությունը մեկնաբանելիս իշխանական բանախոսները մեզ հավաստիացնում էին, որ հողերի հանձնման հարցը չի կարող բանակցությունների առանձին առարկա լինել: Որ առանց Արցախի անկախության ամրագրման հողերի վերադարձի մասին խոսք լինել չի կարող: Որ հենց այդ հողերն են Արցախի անվտանգության «երաշխավորը», և դրանք վերադարձնելու պարագայում մենք կզրկվենք մեր միակ հաղթաթղթից: Դրանք հենց այնպես՝ առանց դրա դիմաց ինչ-որ բան ստանալու հանձնելը դիվանագիտական ապաշնորհության դրսևորում կլինի: Եվ մենք պատերազմում հաղթողից կվերածվենք խաղաղություն մուրացողի»,- գրում է թերթը:
Նյութն ամբողջությամբ կարդացեք թերթի այսօրվա համարում: