Հումորիստ, պրոդյուսեր Վաչե Թովմասյանը Յուքոմ ցանցում գործող Արմենիա Պրեմիումի աշնանային եթերաշրջանում կներկայանա նոր հեռուստանախագծում: Blognews.am-ի հետ զրույցում դերասանը բացել է որոշ փակագծեր նկարահանման ընթացքի, դերասանական կազմի ու սյուժետային առանձնահատկությունների վերաբերյալ:
«Ոսկի դպրոց». սիթքոմ ստանդարտներից դուրս, դասական ու հումորային սիթքոմների միքս, որը չունի տարիքային սահմանափակում: Դերասան Վաչե Թովմասյանը վստահեցնում է՝ սա տարբերվելու է մինչև այս եղած բոլոր նախագծերից: Թեև սյուժետային շատ գծեր դերասանը չի բացում, բայց խոստանում է՝ հեռուստադիտողը կզարմանա:
«Ըստ սյուժեի՝ գլխավոր հերոսը՝ Ռոբերտը, գողանում է ոսկիներ, նրան հետապնդում են ոստիկանները: Ավարը չկորցնելու համար հերոսը որոշում է թաղել ոսկիները: Ավելի ուշ ոստիկաններին հաջողվում է բռնել գողին: 5 տարի բանտում անցկացնելուց հետո ընկերոջ հետ գալիս է ոսկիների հետևից, սակայն պարզվում է, որ դրա տեղում դպրոց է կառուցվել: Նա ստիպված պետք է դիմի խարդախ քայլերի ավարը կրկին ունենալու համար: Որոշում է ուսուցիչ դառնալ ու աշխատանքի անցնել դպրոցում: Բնականաբար, ամեն ինչ այդքան էլ հեշտ չի ստացվում: Սկսվում է արկածներով լի մի պատմություն, որտեղ կա սեր, գաղտնիք, ու ամենակարևորը՝ հումոր»,- պատմում է Վաչեն:
«Ucom-ը շարունակում է աջակցել Արմենիա Պրեմիում հեռուստաալիքի նոր բովանդակության ստեղծմանը: Սիրված դերասանի մասնակցությամբ սիթքոմի յուրաքանչյուր նոր մաս Ucom-ի բաժանորդները կարող են մեկ օր շուտ դիտել «Տեսավարձույթ» բաժնում»,- նշում է Ucom ընկերության գլխավոր տնօրեն Հայկ Եսայանը:
Յուրաքանչյուր սերիան առանձին պատմություն է, ու միևնույն ժամանակ, կան գծեր, որոնք զարգանալու են եթերաշրջանի ընթացքում: Վաչեի խոսքով՝ հեռուստադիտողը սիթքոմը կարող է նմանեցնել հոլիվուդյան կամ գերմանական ֆիլմերի: Դերասանն այդ փաստը օրինաչափ է համարում. «Ամբողջ աշխարհում ընդունված կարգ է օգտագործել հայտնի ու ստացված կլիշեները: Սա դրանցից մեկն է լինելու»:
Դերասանական կազմը հարուստ է ու բծախնդրորեն է ընտրված: Սիթքոմում ընդգրկված են նաև մարդիկ, որոնք տևական ժամանակ էկրաններին չեն եղել. «Գլխավոր հերոսուհին Աննա Գրիգորյանն է, Լալա Մնացականյանը մարմնավորելու է փոխտնօրենին, հետաքրքիր ձևով համագործակցել ենք հումորիստ Գևոյի հետ: Սիթքոմում կտեսնեք նաև ԱրմՔոմեդիից Սերգեյ Սարգսյանին, ինչպես նաև Աշոտ Մելոյանին, «Վիտամինի» Բոնիին, Մհեր Մխիթարյանին ու շատ այլ սիրված դերասանների»:
Յուքոմ ցանցում հեռարձակվող Արմենիա Պրեմիումի եթերում «Ոսկի դպրոց» սիթքոմը կլինի հոկտեմբերի 17-ից:
Նյութը՝ Էմմա Վարդանյանի
