Pastinfo.am-ը գրում է.
Օգոստոսի 29-ին բիլիարդանոցում երիտասարդ աղջկան պատանդ վերցնելու ժամանակ անձին վնասազերծելու ընթացքում ոստիկանության աշխատակիցների գործողությունների իրավաչափության հարցը քննելու նպատակով Քննչական կոմիտեն հարուցել է քրեական գործ:
«Փաստինֆո»-ի հարցմանն ի պատասխան՝ Քննչական կոմիտեի նախագահի խորհրդական Սոնա Տռուզյանը հայտնեց, որ ենթադրյալ հանցագործություն կատարած անձին վնասազերծելու ընթացքում ոստիկանության աշխատակիցների գործողությունները դարձվել են քննության առարկա, սեպտեմբերի 9-ին հարուցվել է քրեական գործ՝ ՀՀ քրեական օրենսգրքի 107-րդ հոդվածի հատկանիշներով, որն ուղարկվել է դատախազություն՝ ըստ քննչական ենթակայության ուղարկելու համար: Եվ այդ գործի շրջանակներում էլ կքննվի ոստիկանության աշխատակիցների գործողությունների իրավաչափության հարցը:
Ինչ վերաբերում է վտանգավոր բռնություն գործադրելու սպառնալիքով երիտասարդ աղջկան պատանդ վերցնելու դեպքին, ապա այն քննվում է Էրեբունի և Նուբարաշեն վարչական շրջանների քննչական բաժնում:
Նշենք, որ ՀՔԱ Վանաձորի գրասենյակի կողմից այսօր հայտարարություն է տարածվել առ այն, որ Գոռ Հակոբյանի մահվան դեպքով քրեական գործ հարուցելու հարցով սեպտեմբերի 11-ին հաղորդում է ներկայացվել ՀՀ Գլխավոր դատախազություն: Մինչդեռ պարզվում է՝ մինչ այդ արդեն քրեական գործ հարուցվել էր։
