Օրեր առաջ համացանցում լուր տարածվեց, որ սցենարիստ, պրոդյուսեր Դիանա Գրիգորյանն այնքան է հոգնել բազմասերիանոց սերիալների ձևաչափից, որ որոշել է կիսատ թողնել նոր սերիալի աշխատանքը և հեռանալ: Տարածված լուրին Դիանան այդպես էլ մեկնաբանություն չէր տվել, միայն այսօր խոսել է BlogNews.am-ի հետ և հերքել լուրը:
«Անկեղծ ասած՝ իսկապես հոգնել էի, և նման որոշում կար՝ սերիալից իմ մասնակցությունը դադարեցնելու, սակայն երկար քննարկումներից և մտորումներից հետո, այնուամենայնիվ, հասկացա, որ մնալը սկզբունքի հարց է: Չի կարելի հիասթափեցնել այն հեռուստադիտողին, ով իրոք հետևում, սիրում և գնահատում է մեր աշխատանքը»:
Դիանան նշում է, որ պետք է պայքարել հայկական հեռուստաեթերում հնդկական սերիալների գոյացող մենաշնորհի դեմ. «Անկախ նրանից՝ ինչպես ես վերաբերվում հայկական սերիալներին, մի բան ակնհայտ է, որ ցանկացած հայկական սերիալ հնդկական սերիալից տարբերվում է նրանով, որ դրա արտադրության ժամանակ իրենց օրվա հացի փողը վաստակում են տասնյակ մարդիկ: Շատ կարևոր է գիտակցել սա, այդ իսկ պատճառով այսօրվա դրությամբ ես զբաղված եմ «Նռան հատիկ» սերիալով թե՛ որպես պրոդյուսեր, թե՛ որպես սցենարի հեղինակ»,- եզրափակեց Դիանան։
Նյութը՝ Սիրանուշ Գրիգորյանի
Լուսանկարները՝ Շուշան Անտոնյանի
