Yerkir.am-ը գրում է.
Գերմանիայի ներքին գործերի նախարարությունն աջակցել է Էրդողանին միջոցառում կազմակերպելու իրավունք չտված դաշնային կառավարության որոշմանը. տեղեկացնում է Ermenihaber-ը։
Թուրքական ընդդիմադիր «T24» կայքի տեղեկացմամբ՝ Գերմանիայի ՆԳ նախարար Թոմաս դե Մայզիերեն «միանշանակ ճիշտ» է համարել Էրդողանին գերմանաբնակ թուրքերի հետ հանդիպման հնարավորություն չտալու վճիռը: «Գերմանիայում առաջիկայում մեկնարկելիք նախընտրական պայքարից առաջ դրսից միջամտելու փորձերն անընդունելի են»,- ասել է Մայզիերեն:
Նախարարը նշել է, որ Թուրքիան Գերմանիայի համար կարևոր գործընկեր է և կշարունակի այդպիսին մնալ, սակայն այդ երկրի հետ հարաբերությունները վերջին շրջանում այնքան էլ հեշտ չեն: Նա կոչ է արել կարգավորել երկու երկրների միջև ծագած լարվածությունը՝ պնդելով, որ Էրդողանի ու նրա համակիրների՝ Գերմանիայում կազմակերպվելիք հնարավոր հանդիպումները այդ առումով որևէ օգուտ չեն կարող տալ:
Թուրքիայի նախագահի խոսնակ Իբրահիմ Քալընը թեմայի վերաբերյալ գերմանացի պաշտոնյաների հայտարարությունները որակել էր «սադրիչ» և «նենգ»:
«Ժողովրդավարության, մարդու իրավունքների և ազատությունների հարցում ամեն առիթով Թուրքիային դասեր տվողները, ահաբեկչական խմբավորումներին, հեղափոխականներին ու օրինախախտներին թիկունք կանգնողները, ջանալով խոչընդոտել մեր նախագահի և մեր քաղաքացիների հանդիպմանը, ի ցույց են դնում Եվրոպայում կիրառվող երկակի ստանդարտները», - ասել էր Քալընը:
Հիշեցնենք, որ Էրդողանը հուլիսի 7-8 -ին Համբուրգում կայանալիք G20 գագաթաժողովի առթիվ կմեկնի Գերմանիա: Այդ ընթացքում նա մտադիր էր նաև հանդիպում կազմակերպել տեղի թուրք համայնքի ներկայացուցիչների հետ: Բայց Գերմանիայի կառավարությունը մերժել էր նման միջոցառման թույլտվություն տրամադրել: Արտգործնախարար Զիգմար Գաբրիելը հայտարարել էր, որ երկու երկրների միջև առկա լարվածության պատճառով «նպատակահարմար» չէ Գերմանիայում նման միջոցառում կազմակերպելը: Կանցլեր Անգելա Մերկելը ևս աջակցել էր ԱԳՆ-ի այս դիրքորոշմանը:
