Ձեռքերի դող երբեմն առաջանում է նույնիսկ առանց պատճառի: Ո՛չ վախի զգացում, ո՛չ անհանգստություն, սակայն ձեռքերը սկսում են դողալ:
Ձեռքերի դողը, բժշկական լեզվով՝ տրեմորը, առաջանում է երկու պատճառով՝ ֆիզիոլոգիական ու պաթոլոգիական:
Ֆիզիոլոգիական պատճառների ցանկում են այն դեպքերը, երբ որևէ իրադարձությունից առաջ կամ որևէ իրավիճակում դուք ունենում եք անհանգստություն, վախ:
Երբեմն դա կարող է լինել երկարատև սթրեսների արդյունքում կամ, օրինակ, ֆիզիկական ծանր աշխատանքից հետո: Սակայն եթե վերը նշված պատճառներից և ոչ մեկը ձեզ մոտ չկա, ապա դա արդեն պաթոլոգիական խնդիր է:
Ներկայացնում ենք այն հիվանդությունները կամ առողջական խնդիրները, որոնք առաջացնում են տրեմոր (ձեռքերի դող):
Եթե դուք ոչնչից չեք վախեցել, չեք անհանգստանում և երկարաժամկետ սթրեսներ չունեք, բայց ձեր ձեռքերը դողում են, ապա սա կարող է լինել մի քանի հիվանդությունների նախանշան կամ արդեն ուղղակի հետևանք:
- Ձեռքերի դող առաջանում է շաքարային դիաբետի դեպքում, երբ արյան մեջ գլյուկոզայի քանակը կտրուկ նվազում է
- Տիրեոտոկսիկոզի դեպքում նույնպես ձեռքերը սկսում են դողալ: Տրեմորը առաջանում է վահանագեղձի հորմոնների մակարդակի կտրուկ բարձրացման դեպքում
- Տրեմոր առաջանում է նաև մակերիկամների հիվանդությունների դեպքում
- Ձեռքերի դող լինում է նաև թունավորումների դեպքում՝ հատկապես ծանր մետաղներով, գազով թունավորվելիս
- Տրեմոր առաջանում է նաև ցրված սկլերոզի, երակային հիվանդությունների և ուղեղի որոշակի վնասվածքների դեպքում
- Եթե ձեռքերը դողում են, ապա դա կարող է լինել պարանոցային օսթեոխոնդրոզի հետևանք
- Տրեմորը հատուկ է նաև հիպերտոնիկ հիվանդություններ ունեցողների համար
Եթե բժշկի մոտ հետազոտություն անցնելուց հետո վերը նշված հիվանդությունները և ոչ մեկ ձեզ մոտ չեն հայտնաբերել, ապա ձեզ հարկավոր է ընդամենը հանգստացնել նյարդային համակարգը:
Այդ հարցում կարող են օգնել տարբեր տեսակի լոգանքները, հանգիստը, հոգեբանի մոտ այցելությունը:
