Սպիտակ տան պաշտոնական ներկայացուցիչ Շոն Սպայսերը, մեկնաբանելով Վաշինգտոնի հետագա սիրիական քաղաքականությունը, ասել է. «Միանցյալ Նահանգները չի բացառում հետագա գործողությունները Սիրիայում, եթե տեղեկություններ ստացվեն քիմիական նոր հարձակումների մասին այդ երկրում»։Մինչ այդ նույնաբովանդակ հայտարարությամբ հանդես էր եկել ՄԱԿ-ում ԱՄՆ մշտական ներկայացուցիչ Նիկի Հեյլին։
Սպայսերի խոսքերից կարելի է ենթադրել, որ շուտով «մազոխիստ և խելագար» Բաշար Ասադը կրկին քիմիական զենք կօգտագործի «ընդդիմադիրների» նկատմամբ ու կսպասի, թե երբ է ԱՄՆ-ն հարձակվելու իր վրա։
Այսինքն՝ ԱՄՆ արտաքին քաղաքականության հեղինակները չեն էլ ջանում, որ խելքին մոտ մի այլ դրդապատճառ հնարեն Սիրիայի վրա հարձակվելու համար։ Վիրավորական է արդեն լսել Վաշինգտոնի պրիմիտիվ պատճառաբանություններն այլ երկրներին ագրեսիայի ենթարկելու համար։ Ժամանակին նույն ԱՄՆ-ն միջուկային զենք ունենալու կասկածանքով հարձակվեց Իրաքի վրա։ Իսկ երբ աշխարհի ամենահարուստ երկրներից մեկը պարզապես քանդվեց և դարձավ քաոսի գլխավոր տարածողը Մերձավոր Արևելքում, ԱՄՆ-ն և իր դաշնակից Մեծ Բրիտանիան հայտարարեցին, որ սխալվել են։ Բայց ԱՄՆ նախկին բարեկամ և դաշնակից Սադամ Հուսեյնը նույն ամերիկացիների ձեռամբ կախաղան էր բարձրացվել, իսկ Իրաքում սկսված քաղաքացիական պատերազմի պատճառով զոհերի և փախստականների թիվը մեկ միլիոնից անցել էր։
Նույն պրիմիտիվ և շինծու պատճառաբանություններով ԱՄՆ-ն հարձակվեց նաև Աֆրիկայի ամենահարուստ երկրներից մեկի՝ Լիբիայի վրա՝ այն վերածելով «դժոխքի ֆիլիալի»։
ԱՄՆ-ն կայսրություն է և նրան անհարժեշտ է միշտ «շարժման», այսինքն՝ պատերազմի մեջ գտնվել։ Միայն ԱՄՆ-ի և նրա որոշ դաշնակիցների համար կառավարելի, իսկ շատերի համար անկառավարելի քաոսը սարսափելի հետևանքներ են թողնում այն տարածաշրջաններում, որտեղ ԱՄՆ-ն ծավալվում է։
Նյութի աղբյուր՝ https://www.facebook.com/gagik.hambaryan/posts/1322591884491424
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել
