Ապրիլի 3-ից յուրաքանչյուր երկուշաբթի և չորեքշաբթի՝ ժամը 21:00-ին, Ucom ցանցում հեռարձակվող «Արմենիա Պրեմիում»-ի եթերում մեկնարկում է «Ազիզյաններ» սիրված սիթքոմի երկրորդ եթերաշրջանը: BlogNews.am-ը օրեր առաջ ներկա է եղել սիթքոմի նկարահանմանը, ֆիքսել հետաքրքիր պահերը և մանրամասներ իմացել նոր եթերաշրջանի մասին:
«Ըստ սիթքոմի օրենքների՝ մեծ փոփոխություններ երկրորդ եթերաշրջանում չպետք է լինեն: Դերասանական կազմը նույն է մնացել, ավելացնումներ չկան, պարզապես ավելի շատ զարգանում են կերպարները: Սիթքոմում յուրաքանչյուր սերիա ունի սկիզբ, կուլմինացիա և ավարտ, սա էլ նպաստում է նրան, որ զարգացումները հետաքրքիր լինեն: Կլինեն իրավիճակներ, որտեղ կհայտնվեն դերասանները և կփորձեն դուրս գալ այդ իրավիճակից»:
Գառնիկի կերպարում հանդես եկող Հայկ Մարությանը նաև նշում է, որ շատ արագ է մտել կերպարի մեջ. «Ես էլ իմ հերոսի նման կյանքում էլ հաճախ եմ հայտնվում նման իրավիճակներում: Բնականաբար, կային նրբություններ, որոնց վրա աշխատել եմ»:
Դերասանուհի Անի Լուպեն, ով մարմնավորում է Ռուզանին, նշում է.«Կերպարային առումով ես չեմ փոխվում, բայց իրադարձություններն այնպես են զարգանում, որ նոր իրավիճակում եմ հայտնվում: Թող շատերի համար անակնալ լինեն զարգացումները, քանի որ այս եթերաշրջանը տարբերվելու է»:
Նյութը՝ Սիրանուշ Գրիգորյանի
Լուսանկարները՝ Կարեն Հովհաննիսյանի
