Գիտակցելով պահի լրջությունը, որը պայմանավորված է առաջիկայում կայանալիք Երևանի քաղաքապետի ընտրություններում ՀՀ նախագահի ընտրությունների իրական արդյունքների վերահաստատման անհրաժեշտությամբ, ես ակնկալում եմ պատասխանատու և հաշվարկված մոտեցում համաժողովրդական շարժման առջև ծառացած հրատապ խնդիրներին: Այն, որ 2009 թվականի քաղաքապետի ընտրություններին ընդդիմությունը չկարողացավ վերահաստատել 2008 թվականի նախագահական ընտրություններում նույնիսկ պաշտոնական տվյալներով արձանագրված արդյունքը, զիջելով ոչ միայն ՀՀՇ-ին, այլ նաև ԲՀԿ-ին, էապես թուլացրեց Հայ ազգային կոնգրեսը՝ սկիզբ դնելով վերջինիս քայքայման գործընթացին: Որպեսզի պատմությունը չկրկնվի, իմ կարծիքով համաժողովրդական շարժման այսօրվա առաջնորդները պարտավոր են վիրտուալ կառավարության ձևավորման վարդագույն պատրանքին տրվելու փոխարեն լծվել վարչախմբի դեմ միջկուսակցական և հանրային ուժերի միասնական լայն ճակատի ստեղծման գործին: Դրա համար նրանք ունեն հաշված օրեր, սակայն, ինչպես մեկ տարի առաջ մեր նիստերի դահլիճում իրավացիորեն նշել է Րաֆֆի Հովհաննիսյանը, քաղաքականության մեջ ճիշտ քայլեր կատարելն երբեք ժամանակավրեպ չէ…
Պետք է հաշվի առնել այն, որ արդեն ակտիվացել են հայտնի բարեգործական հիմնադրամները, որոնք ընտրությունից ընտրություն բարեգործության անվան տակ ընտրակաշառք են բաժանում: Ուրեմն «Ժառանգության» ներկայացուցիչները խորհրդարանում, Սերժ Սարգսյանին «քլնգելու» պատվաբեր գործը չմոռանալով, պետք է շեշտը դնեն օրենսդրական անհրաժեշտ նախաձեռնություններով ընտրակեղծարարության սողանցքների արգելափակման վրա: Ես նկատի ունեմ նախընտրական և ընտրական ժամանակաշրջանում կուսակցությունների և կուսակցական գործիչների, ինչպես նաև ընտրություններին մասնակցող անկուսակցական թեկնածուների կողմից բարեգործական գործունեության ժամանակավոր կասեցման մասին պահանջն ընտրական օրենսգրքում համապատասխան փոփոխությունների միջոցով անշրջանցելի դարձնելու անհրաժեշտությունը: Եթե ընդդիմությանը շուտափույթ չհաջողվի դրան հասնել, ապա հերթական անգամ դեմ կառնի նույն փոցխին: Զարուհի Փոստանջյանի իրավաբանական կրթությունը նրան այդ կարևոր հարցում անհրաժեշտ օրենսդրական լուծումների նախաձեռնությամբ հանդես գալու հնարավորություն է ընձեռում: Շատ կցանկանամ, որ արդյունավետ օգտվի այդ հնարավորությունից…
Հմայակ Հովհաննիսյան,
ՀՔՄ նախագահ,
համատեղության կարգով՝ ամբաստանյալ
P.S Վաղը, մարտի 20-ին, ժամը 9 անց 30-ին, Կենտրոն և Նորք-Մարաշ վարչական շրջանների ընդհանուր իրավասիության դատարանում՝ Տիգրան Մեծի փողոց, 23/1 հասցեում, շարունակվելու է 2012 թվականի ընտրարշավի ժամանակ Սերժ Սարգսյանի պատվերով իմ դեմ հարուցված շինծու քրեական գործով դատավարությունը: Եկել է իմ խոսելու ժամանակը. ցուցմունքներ եմ տալու: Շատ հետաքրքիր է լինելու…
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել