«Աստղային զգեստապահարան». Մերի Ներսիսյան

«Աստղային զգեստապահարան»-ի այս շաբաթվա հերոսուհին «Մայրիկների ակումբ» հաղորդման հաղորդավարուհի Մերի Ներսիսյանն է: «Զգեստապահարանս թարմացնում եմ տարվա եղանակներին զուգահեռ, քանի որ ամեն եղանակ ինձ վրա որոշակի ազդեցություն է թողնում ու հոգեվիճակ թելադրում, իսկ առանց հագուստի երբեմն դժվար է լինում վայելել ու ամբողջովին զգալ նոր եղանակի շունչը»:

Գործնական հանդիպման գնալիս

Այս կերպարը լավագույնս բնորոշում է ինձ: Կան դեպքեր, երբ պետք է լինես գործնական, մի քիչ խիստ, բայց արգելվում է լինել ձանձրալի: Քաղաքային, գործնական ոճից անհնար է բացառել վերնաշապիկը, թեև պետք է խոստովանեմ, որ երբեք չեմ եղել վերնաշապիկների մոլի երկրպագու և միայն մի քանի տարի առաջ սկսեցի կրել դրանք ու միանգամից հասկացա, որ վերնաշապիկն անավարտ ստեղծագործություն է. այն պետք է լրացնել, ավարտել՝ շարֆ, բրոշ, խոշոր զարդեր: Խոսքը, թերևս, այս վերնաշապիկի մասին չէ, քանի որ այն հարուստ է պրինտներով, ուստի ավելորդ մեկ աքսեսուար, և այն կարող է գերծանրաբեռնվել: Միշտ առաջնորդվում եմ հակասությունների սկզբունքով. այս վերնաշապիկը միշտ կրում եմ միագույն, աչքի չընկնող տաբատի կամ կիսաշրջազգեստի հետ՝ հավասարակշռելով կերպարը: Ի դեպ՝ իմ զգեստապահարանում կան հագուստի տարրեր, որոնք արդեն մի քանի տարի է, ինչ ունեմ ու պարբերաբար կրում եմ. այս վերնաշապիկը դրանցից է:

Հագուստի վրա երբեք աստղաբաշխական գումարներ չեմ ծախսել ու չեմ ծախսի: Ինչ խոսք, կան ոճեր, կան հագուստի տեսակներ, աքսեսուարներ, որոնք պարտադրում են թանկարժեք տեսք: Միայն դրանց վրա կարելի է շատ գումար ծախսել և մի քանի, աչքդ շոյող նմուշ ունենալ զգեստապահարանումդ: Ուրախալի է, որ 21-րդ դարում դու կարող ես շատ քիչ գումար ծախսելով հագնվել նորաձև ու թրենդային:

Աղջիկներիս հետ զբոսնելիս

Վարդագույնը իմ եսի հակառակ կողմն է: Այս գույնն, իհարկե, սևի ճկունությունը չունի, բայց դրա հաղորդած տրամադրությունն ինձ համար անփոխարինելի է: Ինձ ավելի հարազատ են վարդագույնի սառը երանգները. մի քիչ տաք, մի քիչ «քաղցր», ու ես այդ հագուստին մոտ չեմ գնա: Ես աշխատում եմ, ունեմ մեծ ընտանիք, երկու երեխայի մայր եմ, ինչը չի կարող ինձ խանգարել, որ ժամանակ առ ժամանակ ցանկանամ լինել թեթև, պարզ, մի քիչ թիթիզ: Այս կերպարում դարձյալ համադրել եմ իմ սիրելի միտումները՝ կիպ կիսատաբատ, տրենչ, հայելային փայլով ակնոց: Բծախնդիր եմ կոշիկների ընտրության հարցում. ճիշտ այնպես, ինչպես սիրում եմ բարձրակրունկներ, այդպես էլ նախընտրում եմ հարթ ներբաններով կոշիկ: Դրանք, որպես կանոն, աչքի ընկնող չեն, ուստի վառ կերպար ստանալու համար նախապատվությունը տալիս եմ ակտիվ դետալներով տարբերակներին, օրինակ՝ այս մեկը, որ զարդարված է ապակյա բրոշով:

Մոխրագույն, սև, սպիտակ և մորեգույն. սրանք իմ գույներն են: Այս գույների բոլոր երանգները միշտ սիրելի են եղել ինձ համար ու շարունակում են գերիշխել զգեստապահարանումս: Այս պահին իմ զգեստապահարանում չեք գտնի կարմիր գույնի որևէ հագուստ կամ աքսեսուար:

Կոնկրետ այս շրջանում խենթանում եմ սպորտային նորաձև կոշիկների, ակնոցների ու ժամացույցների համար: Ժամանակ առ ժամանակ այս ցանկը կտրուկ փոխվում է:

Շոփինգի, երեխայի հետ դպրոց գնալիս

Ես այնքան հաճախ եմ շնորհակալություն հայտնում այն մարդկանց, ովքեր նորաձևություն բերեցին սպորտային կոշիկները. դրանք ես անվանում եմ կախարդական մաշիկներ: Նորաձև, գեղեցիկ լինելուց բացի՝ դրանց թիվ մեկ առավելությունը հարմարավետությունն է: Այս կերպարով ես կարող եմ սարեր շուռ տալ՝ վազել աշխատանքի, հետո Սառային տանել զբոսանքի, գնալ Էվայի հետևից դպրոց, սրճել ամուսնուս հետ մի քանի րոպեում, գնումների գնալ և այսպես շարունակ: Գարնանն ու ամռանը իմ զգեստապահարանը ակնթարթորեն գունավորվում է. առանց վառ գույնի բլուզների ես դառնում եմ մռայլ ու դեպրեսիվ: Օվերսայզ, շատ լայն, երկրաչափական որոշակի պատկերներ հիշեցնող հագուստ հաճախակի չեմ կրում: Ես բարձրահասակ եմ, և նմանօրինակ «ոչ ստանդարտ» հագուստը չափից ավելիի տպավորություն է թողնում, բայց, ինչպես միշտ, այս դեպքում էլ խնդիրը համադրությունների մեջ է: Այս դեպքում վառ երանգ ու փքուն ֆորմա ունեցող բլուզը համադրել եմ ամենահասարակ սպիտակ ջինսե տաբատի հետ, ինչը թույլ է տալիս այն կրել առօրյայում: Բլուզի մի քիչ կոպիտ գործվածքն ու սպորտային տրամադրությունն ընդգծել եմ սպորտային կոշիկներով:

Շոփինգն ինձ համար նախևառաջ լիցքաթափվելու հիանալի տարբերակ է, հատկապես, երբ գնումների չեմ գնում հստակ պահանջներով։ Փորձը ցույց է տվել, որ եթե շոփինգի եմ գնում կոնկրետ պահանջով, հստակ իր փնտրելու, այդ հաճելի գործընթացը վերածվում է տառապանքի: Պատանեկության և երիտասարդության շրջանում գնումների գնում էի մայրիկիս հետ, ով սիրում էր ինձ երես տալ, ու հիշում եմ, թե որքան էի տանջում մայրիկիս, օրերով կարող էի որևէ իր փնտրել ու չգտնել:

Միշտ հետևում եմ թրենդներին, բայց գնումներ անելիս ու զգեստապահարանս թարմացնելիս չեմ առաջնորդվում միայն դրանցով: Երբ տեղեկացված ես, ակամա դա ազդում է կատարածդ ընտրության վրա, բայց ոչ ավելին:

Պարային երեկույթների գնալիս

Կյանքը գեղեցիկ է իր կոնտրաստներով, նորաձևությունը՝ նույնպես: Այսպիսի էքսպերիմենտները միշտ իմ սրտով են: Համադրել բրուտալ կիսաճտքավոր կոշիկը թափանցիկ, նուրբ կիսաշրջազգեստի հետ ու կերպարին ավարտուն տեսք հաղորդել գունավոր կրծքանշաններով զարդարված կաշվե սև պիջակով. սա է ոճի քիմիան: Այսպիսի կերպարը պատմում է ուժեղ, համարձակ կնոջ մասին, ով չի վախենում ի ցույց դնել նաև իր թուլությունը, կանացիությունը:

Կարող եմ ծայրահեղ փոփոխություններ անել, բայց չեմ սիրում նման քայլերի հաճախակի գնալ: Մեկ օրում հրաժարվեցի մազերիս գույնից, երկարությունից։ Հիմա չեմ պատկերացնում ինձ սևահեր կամ խարտյաշ, բայց միգուցե վաղը ներքին մի պահանջ ծնվի, ու ես առանց վայրկյան անգամ մտածելու դիմեմ կտրուկ փոփոխության:

Պրեմիերաների, փակ միջոցառումների գնալիս

Եթե մոխրագույնն ունի 50 երանգ, ապա սևի երանգներն անհաշվելի են:))) Ճիշտ ընտրված սև հագուստով կարող ես լինել կոկետ, պահպանողական, գայթակղիչ, վամպ, ռոքային, դասական և նույնիսկ անտեսանելի: Սևն իմ գույնն է, այն կարծես փոփոխվում է տրամադրությանս հետ: Հատկանշական է, որ ամռանը հազվադեպ եմ սև կրում՝ նախապատվություն տալով ծիածանի գրեթե բոլոր գույներին ու դրանց երանգներին, իսկ եղանակի ցրտելուն պես վերադառնում եմ տարերքիս, որը չի ճանաչում տենդենցներ, միշտ նորաձև է: 2016-ին պոդիումները հեղեղեցին լայն, երկար տաբատները, որոնք, իհարկե, մի քիչ ռիսկային են՝ կարող են «գիրացնել», ուստի շատ զգույշ պետք է մոտենալ այսպիսի տաբատի ընտրությանը, ու քանի որ այն բավական «ծանր» է, ես այն համադրել եմ թափանցիկ բլուզի ու փոքր պայուսակ-տուփի հետ. դրանք ընդգծում են տաբատի խստությունը, բայց նաև մի փոքր թեթևություն են հաղորդում կերպարին: Դե իսկ կոշիկի հարցում երկընտրանք լինել չէր կարող՝ բարձր կամ շատ բարձր. տաբատն է պահանջում: 

Վերջին տարիներին շատ հաճախակի եմ դիմում սեփական դիզայնով կարված հագուստների տարբերակին: Ունեմ բազմաթիվ հաջողված զգեստներ, որոնց հեղինակը ես եմ։ Անչափ հաճելի է, որ հենց այդ զգեստներին ուղղված հաճոյախոսություններ եմ լսում ու վերջում հպարտորեն ասում, որ հեղինակը ես եմ:

Պիտի խոստովանեմ, որ թուլություն ունեմ՝ խենթանում եմ հետաքրքիր ու յուրօրինակ հողաթափերի համար: Կարող եմ օրերով հողաթափ փնտրել։

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի

Արտ տնօրեն՝ Կարեն Անտինյան