Քաղաքականության և բիզնեսի ոլորտում փողկապների ամենատարածված գույները կարմիրն ու կապույտն են: Հաճախ կարելի է հանդիպել նաև մանուշակագույն կամ դեղին փողկապներ կրող քաղաքական գործիչների ու բիզնեսմենների, սակայն ասում են, որ այդ քայլով նրանք փորձում են հեռու մնալ «փողկապային խաղերից»:
Հարկ է հասկանալ, թե արդյոք կարևոր է փողկապի գույնը: Բազմաթիվ ուսումնասիրություններ պնդում են, որ, այո, այն մեծ նշանակություն ունի:
Սկզբում բերենք պատմական մի քանի օրինակներ:
2017 թվականի փետրվարի 28-ին Դոնալդ Թրամփը Կոնգրեսում ունեցած առաջին հանդիպման ընթացքում կրում էր կապույտ ու սպիտակ գծերով փողկապ: Նրա ետևում նստած փոխնախագահ Մայք Պենսն ու Սպիտակ տան խոսնակ Պաուլ Ռայանն էլ կրում էին կապույտ փողկապներ:
Հունվարի 20-ին տեղի ունեցած երդմնակալության ժամանակ Թրամփն իր մուգ գույնի կոստյումի հետ կրում էր կարմիր փողկապ, մինչդեռ նախկին նախագահ Օբաման իր համար ընտրել էր կապույտը: Նախագահների տիկնայք հագնվել էին հակառակ գույներով. Միշել Օբաման կրում էր կարմիր զգեստ, իսկ Մելանիա Թրամփը՝ բաց կապույտ հագուստ:
2016 թվականին նախագահական առաջին բանավեճի ընթացքում Թրամփը կրում էր կապույտ փողկապ, իսկ նրա հակառակորդը՝ Հիլարի Քլինթոնը, կրում էր կարմիր կոստյում: Հոկտեմբերի 4-ի՝ փոխնախագահների բանավեճի համար դեմոկրատները Թիմ Քեյնի համար ընտրել էին կարմիր փողկապ, իսկ Թրամփի թեկնածու Մայք Փենսը ներկայացավ կապույտ փողկապով:
Նախագահ Օբաման իր նախագահության առաջին 11 օրերի ընթացքում կրում էր բացառապես կարմիր կամ կապույտ փողկապներ: Նորաձևության մասնագետ Վենդլի Բրաունն այդ առիթով նշել է, որ Օբաման քաղաքականության ոլորտում գուցե հեղափոխություններ անի, բայց ինչ վերաբերում է նորաձևությանը, նա հագնվում է այնպես, ինչպես բոլորը:
2009-ի հունվարին կայացած երդմնակալության ընթացքում Բարաք Օբաման ու Ջո Բայդենը կարծես որոշել էին համագործակցել: Նրանք երկուսն էլ այդ օրվա համար ընտրել էին սպիտակ վերնաշապիկ ու մուգ մոխրագույն կոստյում՝ ընդգծված բաց կապույտ և կարմիր փողկապներով: Քանի որ Օբաման կապույտ փողկապը կրում էր երկուշաբթի օրը, Ջո Բայդենը կապույտ կրեց երեքշաբթի: Հավանաբար նրանք նախօրոք պայմանավորվել էին, որ նույն օրը միագույն փողկապներ չկրեն:
Նախկին նախագահ Ջորջ Բուշն իր կնոջ՝ Բարբարա Բուշի հետ, երդմնակալության արարողությանը կրում էր մուգ մանուշակագույն վերարկու և շարֆ: Իսկ ինչպես հայտնի է, մանուշակագույնը համարվում է թագավորական գույն:
Կարմիր ու կապույտ փողկապներ կրելու սովորությունն իրականում գալիս է դեռ հնուց: Կապույտն ասոցիացվում էր բրիտանական ազնվականության կապույտ արյան հետ, իսկ կարմիրը՝ բրիտանական պահակախմբերի կարմիր արյան հետ:
Կարմիրը միշտ կապել են սիրո հետ ու համարել սիրո գույն: Վերջերս արված ուսումնասիրության համաձայն՝ կարմիր հագուստ կրող կանայք ավելի ցանկալի են տղամարդկանց համար: Անգամ սպորտում կարմիր մարզազգեստով կանայք սովորաբար գերազանցում են իրենց մրցակիցներին, քանի որ մրցավարներն ակամա ավելի մեղմ են վերաբերվում կարմրազգեստ մասնակիցներին:
Ինչպես բոլորս գիտենք, քաղաքական գործիչները միշտ ձգտում են ամեն ինչից օգուտ քաղել, իսկ փողկապների գույնի ընտրությունը դրա վառ ապացույցն է:
Հոգեբանները նույնպես ասում են, որ կարմիրն ու կապույտը բարելավում են ուղեղի աշխատանքն ու տպավորություն գործելու շանսերը: 2009-ին կատարված հետազոտությունն էլ է նույնը փաստում և ավելացնում, որ կան բաներ, որոնց մասին որոշ հայտնի քաղաքական գործիչներ ու նախագահական թեկնածուներ թերևս տեղյակ չեն: Պարզվում է, որ կարմիրն ուշադրություն գրավելու ամենաարդյունավետ միջոցն է, մինչդեռ կապույտը խթանում է ստեղծարար մտածողությունը:
Հետազոտողները մի փորձի ընթացքում 600 մարդկանց տվեցին առաջադրանք, որի կատարման համար պահանջվում էր կա՛մ հզոր ուշադրությամբ ու հիշողությամբ զինված ուղեղ, կա՛մ ստեղծարար մտածողություն: Իսկ համակարգիչները, որոնցով պետք է աշխատեին մասնակիցները, կա՛մ կապույտ էին, կա՛մ կարմիր:
Կարմիր համակարգչով աշխատողները 31%-ով ավելի լավ կատարեցին մտապահման, հիշողության և սրբագրման հետ կապված առաջադրանքները, քան կապույտով աշխատածները: Իսկ ստեղծարար մտքեր և նորարար գաղափարներ արտահայտելուն դրդել էր կապույտ համակարգչով աշխատելը:
Երթևեկության կարմիր նշանները, արտակարգ իրավիճակների համար նախատեսված մեքենաներն ու ուսուցիչների կարմիր գրիչները մեզ ստիպել են կարմիր գույնն ասոցիացնել վտանգի, սխալ վարքագծի կամ զգույշ լինելու հետ: Ասում են, որ կարմիրը մեզ միշտ դարձնում է զգոն և օգնում ուշադրություն պահանջող առաջադրանքներն ավելի լավ կատարել:
Իսկ կապո՞ւյտը: Երկնքի, օվկիանոսի ու ծովերի հետ ասոցիացման շնորհիվ կապույտ գույնը սովորաբար կապում ենք ազատության, խաղաղության և համերաշխության հետ: Երբ գործ ենք ունենում կապույտի հետ, նշված ասոցիացումները մեզ օգնում են զգալ ավելի ապահով, պրպտող ու ստեղծարար: Ահա թե ինչու է կապույտը շատերի սիրելի գույնը:
