Հայաստանի մայրաքաղաքի, մեր քաղաքի ԿԱՌԱՎԱՐՄԱՆ ՄԱՐՄՆԻ ընտրությունները:
Ինձ համար կոնկրետ շատ կարևոր են այս ընտրությունները, հավասարապես կարևոր, ինչպես նախագահական և խորհրդարանական ընտրությունները: Չեմ թաքցնի՝ որոշ դեպքերում նաև ավելի կարևոր:
Սա այն պահն է, երբ դու ընտրում ես մի կառույց, մի մարմին, մի ղեկավար, որի դրական կամ բացասական գործունեությունը զգալու ես ամեն օր, ամեն ժամ և ամեն պահ:
Այդ ընտրության արդյունքով է ձևավորվելու քո տրամադրությունը, քո հարմարավետությունը, քո հպարտությունը, քո առօրյան և շատ ու շատ այլ բաներ:
Իհարկե, սա քաղաքական ընտրություն է, բայց պետք է լինի ԵՐԵՎԱՆ ՔԱՂԱՔԻ ԶԱՐԳԱՑՄԱՆ ՔԱՂԱՔԱԿԱՆՈՒԹՅԱՆ ընտրություն:
Սա մի իրադարձություն է, երբ մենք (երևանցիներս) պետք է կտրվենք համապետական քաղաքական գործընթացներից և սթափ գնահատենք մեր քաղաքի խնդիրները, մեր քաղաքի հոգսերը, առաջարկվող ծրագրերում փնտրենք մեր պահանջները և ԿԱՏԱՐԵՆՔ ՃԻՇՏ ԸՆՏՐՈՒԹՅՈՒՆ:
Ինձ համար ընտրությունը մեծամասամբ պայմանավորված է համեմատական վերլուծության արդյունքներով:
Ի՞նչ ունեինք, ի՞նչ ունենք և ի՞նչ ենք ունենալու:
Սրանք այն հարցերն են, որոնք պետք է օգնեն ճիշտ ընտրություն կատարելուց:
Մեծագույն հիասթափություն կապրեմ, եթե Երևանի զարգացման քաղաքականության ընտրությունները ստորադասվեն կամ ստվերվեն համապետական քաղաքական գործընթացներով:
Սիրելի երևանցիներ, սիրելի համաքաղաքացիներ, եկեք մտածենք մեր քաղաքի մասին, մեկ ամիս միայն մեր քաղաքի մասին:
Ի վերջո Երևանի զարգացումը միայն երևանցիների համար չէ: Մեր ընտրությամբ, մեր ճիշտ ընտրությամբ հպարտանալու են բոլոր:
