Ինձ էլ է շատ հետաքրքիր, թե դեսպանին սպանած «նախկին» ոստիկանին ինչու՞ գնդակահարեցին, երբ շատ հեշտ կարելի էր վնասազերծել և «տաք-տաք» բացահայտել Կառլովի սպանության պատվիրատուներն։ Սակայն Անկարայում առաջնորդվեցին «Մավրն արել է իր գործը, մավրը պետք է հեռանա» կարգախոսի համաձայն։ Այսինքն՝ 22-այա Մերթ Ալթընթաշը սպանեց ՌԴ դեսպանին Թուրքիայում, նրան կարելի էր վերացնել։
Հետաքրքիր է, որ եթե Անկարայում կան քաղաքական և հասարակական գործիչներ, որոնք կասկածում են Կառլովի սպանության պաշտոնական վարկածին, ապա Մոսկվայում այլ իրավիճակ է։ Ռուսաստանյան հեռուստաալիքներով և ռադիոկայաններով հեռարձակվող թոք-շոուների մասնակիցները՝ հայտնի վերլուծաբանները, արևելագետները, քաղաքագետները և քաղաքական գործիչները բոլորով մեկ եղած պնդում են, որ ինչ-որ «անհայտ», բայց իրենց համար կռահելի մի ուժ փորձում է Կառլովի սպանությամբ սեպ խրել ռուս-թուրքական հարաբերությունների մեջ։ Մրցապայքար է սկսվել սրանց մեջ, թե ով ավելի թրքասեր և թրքամոլ հայտարարությամբ հանդես կգա։ Սրանք չեն հասկանում, որ Անկարան ՆԱՏՕ-ի անդամ է և մինչև հիմա երազում է դառնալ Եվրամիության անդամ, և երբ այդ, իրենց համար հայտնի ուժերը ցանկանան, ապա Անկարան, ինչպես շատ է պատահել, երես կթեքի ռուսներից։ Ռուսաստանցի վերլուծաբաններին լսելուց ուղղակի զարմանում ես, թե ինչպես սրանք չեն հասկանում, թե ինչու է Ռուսաստանն իր պատմության ընթացքում ամենաշատը՝ 12 անգամ պատերազմել Թուրքիայի դեմ։ Ու քանի դեռ չեն ուզում հասկանալ, ապա այդ պատերազմները դեռ կլինեն, որոնց ժամանակ Թուրքիայի թիկունքում մշտապես կլինեն նրա հիմնական գործընկերները՝ Մեծ Բրիտանիան, Ֆրանսիան, Գերմանիան, հիմա արդեն ԱՄՆ-ն։ Մոսկվայում չեն հասկանում կամ չեն ուզում ընդունել, որ անցյալ տարվա նոյեմբերի 24-ին ռուսական ռազմական ինքնաթիռի հետ Սիրիայի օդային տարածքում տեղի ունեցածը մարսելուց հետո Անկարան ավելի մեծ և նվաստացուցիչ հարվածներ էր հասցնելու Պուտինին։ Չմոռանանք, որ ռուսական ռազմական օդանավի խոցելուց հետո, երբ Մոսկվան պատրաստ էր կտրուկ քայլեր ձեռնարկել Անկարայի դեմ, Պուտինին «երկնքից գետին իջեցրեցին» ՆԱՏՕ-ն և ԱՄՆ-ն, որոնց հիմա Ռուսաստանը փորձում է մեղադրել ՌԴ դեսպանին սպանողին հովանավորելու և ռուս-թուրքական հարաբերությունները փչացնելու մեջ։
Նյութի աղբյուր՝ https://www.facebook.com/gagik.hambaryan/posts/1215215141895766
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ:
print
Տպել