Իսկը ժամանակն է նման մուրաբա եփելու համար: Սա այն դեպքն է, երբ երկակի վայելք կարելի ստանալ և թարմ նարնջից և դրա կեղևից պատրաստված մուրաբայից: Բաղադրությունը` 5-7 նարնջի կեղև 500 գ շաքարավազ 500 մլ ջուր 1 կիտրոն: Որպեսզի մուրաբան սիրուն տես ունենա, սիրուն էլ պետք է այդ ցիտրուսն ուտել, այսինքն, չկեղևել, ինչպես անում ենք մանդարինի դեպքում, այլ դանակով շերտերի բաժանել կամ էլ քառահատել: Շերտերից կարելի է պարույրներ փաթաթել, իսկ կտորներից` խորանարդներ կտրատել: Պարույրները կարելի է ասեղ թելով ուլունքի պես շարել, որ չքանդվեն:
Եթե նարինջը հաստ կեղև ունի, ապա պետք է նախապես կեղևները շոգեխաշել.դրա համար թրջել մեկ օր առաջ, հետո հեռացնել կեղևի սպիտակ մասը: Դրանից հետո կրկին թրջել 3 օրով: Ընդ որում, ամեն օր ջուրը պետք է 5-6 անգամ փոխել: Ջուրը պետք է լինի սովորական, սառը: Եթե այս պրոցեդուրան 3 օրից պակաս արվի, ապա մուրաբան դառնահամ կստացվի:
3 օրից հետո կեղևի վրա ջուր լցնել ու եռալուց 15 րոպե հետո եփել թույլ կրակի վրա: Ապա ջուրը թափել ու կրկին սառը ջուր լցնել վրան ու կրկին եռացնել: Այդպես կրկնել 3 անգամ, այսինքն` կեղևը եռացնել 3 անգամ` 15 րոպե, յուրաքանչյուր անգամ ` նոր ջրում:
Հիմա պետք է շաքարահյութը պատրաստել.վերցնել 500 մլ ջուր, ավելացնել 500 գ շաքարավազ: Եռացնել այնքան, մինչև շաքարավազը հալչի: Պատրաստի շաքարահյութի մեջ լցնել խաշած կեղևները ու եփել մարմանդ կրակի վրա 30 րոպե: Դրանից հետո կրակն անջատել ու թողնել, որ հովանա: Ապա 1 կիտրոնի հյութ ճզմել ու կրկին եփել 30 րոպե: 2-րդ եփից հետո շաքարահյութը հովանալուց հետո կեղևները հանել, հեռացնել թելը: Եթե մտադիր եք մուրաբան պահել սառնարանում, ապա պետք է կեղևը դասավորել բանկայի մեջ ու վրան շաքարահյութ լցնել:
Նյութերը մասնակի կամ ամբողջությամբ մեջբերելիս ակտիվ` հիպերլինքով հղումը Ankakh.com-ին պարտադիր է:
