Ռուսաստանյան շոու-բիզնեսի հայտնի երգչուհի Ժաննա Ֆրիսկեն որոշել է ծննդաբերել Մայամիում: Ատլանտյան օվկիանոսի ափին իր հանգիստը վայելող ապագա մայրիկը հարցազրույց է տվել «Hello» ամսագրին ու, իհարկե, ցուցադրել կլորացած փորը:):
38-ամյա Ֆրիսկեի ընտրյալն ու առաջնեկի հայրը հայտնի հաղորդավար 30-ամյա Դմիտրի Շեպելեւն է: Զույգը պաշտոնապես ամուսնացած չէ, երգչուհին էլ սպիտակ զգեստի ու շքեղ հարսանիքի մասին չի երազում. «Ես ու Դիման այլ կերպ ենք մտածում. միասին լինելու համար մեզ ԶԱԳՍ-ի կնիքներ պետք չեն: Մենք երջանիկ ենք, իսկ ամենակարեւորն էլ հենց դա է»:
Ժաննան նշել է, որ ինքն էլ յուրաքանչյուր կնոջ պես երազել է մայրանալու մասին. «Բայց մի բան է երազել, մեկ այլ բան` պլանավորել, երրորդի դեպքում էլ ճակատագիրն է իր գործն անում: Հղի լինելուս մասին իմացել եմ հանգստից վերադառնալուց հետո: Շատ ուրախ եմ, շատ սպասված բալիկ է, բայց անկեղծ ասած` ոչ պլանավորված»:
Երեխային խնամելու հարցում աստղային մայրիկին օգնելու են քույրն ու մայրը. «Այլապես շատ բարդ կլինի ինձ համար: Երեխայիս սեռը չենք պարզել. տարբերություն չենք դնում եւ սիրով կընդունենք Աստծո պարգեւած զավակին»:
Խոսելով Մայամի տեղափոխվելու պատճառների մասին` Ժաննան հետեւյալն է ասել. «Մոսկվայում շատ դժվար էր: Նախ` կլիման հարմար չէր, բացի այդ, նյարդայնանում էի ուշադրության կենտրոնում եւ դեղին մամուլի թիրախ լինելուց: Ամեն ինչի սովոր եմ, բայց այլեւս մեծ պատասխանատվություն եմ կրում բալիկիս համար»:
Ֆրիսկեն ասել է, որ համատեղելու է աշխատանքն ու ընտանեկան կյանքը, չի մոռանալու նաեւ զբաղվել սիրելի հոբբիներով ու ճանապարհորդելու է:
Պատրաստեց Լենա Գեւորգյանը /Bravo.am/
Աղբյուրը` Spletnik
