Ահա, թե ինչպես մեկընդմիշտ ազատվել մեջքի և պարանոցի ցավերից

Եթե քեզ տանջում է մեջքի և պարանոցի շրջանում ցավը, ունես խնդիրներ ճնշման հետ կապված, իսկ գիշերային քունդ անհանգիստ է, ուրեմն՝ այս վարժությունները հենց քեզ համար են:

Ներքևում նշվածները  յոգայի ամենապարզ դիրքերն են, որոնք նախատեսված են սկսնակների համար: Արդեն 3-րդ վարժանքից հետո դու կզգաս, որ մարմինդ ավելի «թեթև» է, իսկ մկաններդ՝ ամուր:   Քո քունն ավելի հանգիստ ու երկար կտևի, իսկ  առօրյա խնդիրներ լուծելու համար քո էներգիան շատ ավելին կլինի: Ցանկացած ցավ, որը դու ունեիր գոտկատեղի և պարանոցի հատվածում, կանհետանա:

Դիրք 1. նստիր՝ ոտքերդ խաչելով, զգա, թե ինչպես է ձգվում, թուլանում ողնաշարդ: Կարող ես ձգվել դեպի վեր՝ մարմնիդ ծանրությունը կենտրոնացնելով խաչված ոտքերիդ վրա: Մնա այդ դիրքում մի քանի րոպե, շնչիր հնարավորինս խորը և հանդարտ: Դա կօգնի քեզ ձերբազատվելու սթրեսից ու ավելի արդյունավետ դարձնելու մարզանքը:

Դիրք 2․ խոնարհում դեպի առաջ: Նստիր, ոտքերդ ձգիր առաջ: Դանդաղ փորձիր ձեռքով հասնել ոտքերիդ ծայրին: Ձգվիր այն պահին, երբ արտաշնչում ես, որովհետև այդ պահին  ոտքերիդ մկանները առավել քան հակված կլինեն ձգվելու:

Դիրք 3․ մանկան դիրք: Կանգնիր ծնկներիդ վրա, բացիր ծնկներդ ուսերիդ լայնությամբ, ձեռքերդ պահիր իրանիդ հետևում: Դանդաղ թեքվիր առաջ, գլուխդ կախիր: Այս թուլացած դիրքում մնա 3-4 րոպե, շնչիր խորը և հանդարտ, զգա՝ ինչպես է մեջքդ հանգստանում:

Դիրք 4. պտույտներ
Աջ ձեռքդ տեղավորիր ձախ ծնկիդ վրա: Ձախ ձեռքդ ֆիքսիր իրանիդ հետևում, դանդաղ թեքվիր դեպի ձախ: Գլուխդ թեքիր մարմնիդ հետ միասին, նայիր դեպի ձախ: Շնչիր հնարավորինս խորը, դանդաղ վերադարձիր ելման դիրքի: Զգա՝ ինչպես են ձգվում կոնքերիդ, ինչպես նաև որովայնիդ թեք ու կողային մկանները: Նույնը կրկնիր նաև աջ ոտքի հետ:

Դիրք 5․ աստվածուհու դիրք: Պառկիր մեջքիդ վրա: Փռիր ոտքերդ, իսկ  հետո իրար միացրու ոտնաթաթերդ՝ առանց ոտքերդ հատակից կտրելու: Շնչիր համաչափ, փորձիր ձգել կոնքերիդ մկաններն այնպես, որ զգաս դա: Մնա այս դիրքում այնքան, քանի դեռ հարմարավետ ես քեզ զգում: Սովորաբար 2 րոպեն լրիվ բավարար է լինում:

Դիրք 6. ոտքերը՝ պատին:  Ձգիր ոտքերդ և տեղավորիր պատի վրա: Իրանդ ու ձեռքերդ թույլ պահիր: Այդ դիրքում անցկացրու 3 րոպե: Շնչիր խորը: Ձգտիր հեռու մնալ տհաճ մտքերից, զգա, թե ինչպես են հանգստանում լարված մեջքդ ու ոտքերդ:

 
 Դիրք 7. երջանիկ մանկան դիրք: Պառկիր մեջքիդ վրա: Ծալիր ձեռքերդ ծնկների հատվածում, ոտնաթաթերդ խաչիր: Ձեռքերով գրկիր ծնկներդ և պահիր: Զգա՝ ինչպես են ձգվում կոնքերիդ ու մեջքիդ մկանները: Սկզբնական շրջանում սա բարդ կլինի քեզ համար, բայց որոշ ժամանակ անց ամեն ինչ շատ հեշտ կստացվի: Լավ հիշիր՝ այս դիրքը լավագույնն է ողնաշարի լարվածությունը հանելու համար: Մի՛ մոռացիր ընթացքում խորը շնչելու մասին:

Դիրք 8. աղավնու դիրք: Կանգնիր չորեքթաթ, ձեռքերդ պարզիր ուսերիդ լայնությամբ: Ձախ ծունկդ ծալիր ձեռքերիդ կենտրոնում: Աջ ոտքդ հետ տար ու ձգիր: Խոնարհիր ողջ մարմինդ՝ ծանրությունը կենտրոնացնելով ձախ ծնկիդ վրա: Այդ դիրքում մնա 1 րոպե, հետո փոխիր ոտքդ: Այս վարժությունն ազատում է ոտքերի ցավից, այտուցվածությունից, լիցքաթափում է մեջքի մկանների լարվածությունը:

Դիրք 9. զարթոնքի դիրք: Պառկիր մեջքիդ վրա, լայն բացիր ձեռքերդ: Աջ ծունկդ սեղմիր կրծքիդ: Այնուհետ ողջ իրանդ շրջիր դեպի  ձախ՝ մեջքդ պահելով ձիգ և ուղիղ: Մնա այս դիրքում մոտ 3 րոպե: Կրկնիր հակառակ կողմից ևս: Այս դիրքն օգտակար է նրանց, ում  մոտ պոչուկի շրջանում հաճախ է ցավում մեջքը:

 
 Դիրք 10. ձկան դիրք: Պառկիր մեջքիդ վրա: Ձեռքերդ տեղավորիր կոնքիդ տակ: Կուրծքդ դանդաղ վեր բարձրացրու՝ միաժամանակ գլուխդ հետ գցած վիճակում: Շնչիր համաչափ, դանդաղ ներքև իջիր:

Այս բոլոր վարժություններից հետո դու քեզ առույգ ու թարմ կզգաս: Փորձիր անպայման, չէ՞ որ առողջ ապրելակերպին հետևելը ոչ միայն առողջություն է, այլ նաև՝ լավ տրամադրություն:

պատրաստեց՝ Արմինե Հայրապետյանը