EXCLUSIVE
Այս երգչուհին «Հայաստանի ձայն»-ը նախագծից հիշվեց որպես ձայնային լավ տվյալներով, կարմրահեր Գայա, իսկ հիմա նրան անվանուն են «Նախշուն բաջի» Գայա Արզումանյան, ով վերջին շրջանում կերպարանափոխվել է, նիհարել տասը կիլոգրամ և BlogNews.am-ի հետ զրույցում առաջին անգամ խոսում է իր պլաստիկ վիրահատության մասին: Երգչուհու հետ անկեղծ զրույց ենք ունեցել:
- Գայա, քո նոր ոճը և կերպարը վերջերս շատ էր քննարկվում համացանցում: Հեռուստադիտողը քեզ «Հայասատնի ձայնից» հիշեց որպես կարմրահեր, հիմա շիկահեր ես: Հեշտ ե՞ս փոփոխվելու որոշում կայացրել:
- Իհարկե բարդ էր, քանի որ ես մի քիչ դժվար եմ համոզվում, բայց Արայիկ Գաբաջյանին հաջողվեց ինձ համոզել, և ճիշտ աշխատանքի արդյունքում հասանք այս ամենին: Շատ դրական արձագանքներ եմ ստանում, ինչը հաճելի է: Ես ում հետ աշխատել եմ, այնպես է ստացվել, որ իմ փոխարեն նրանք են որոշումներ կայացրել, իսկ Արայիկի հետ համատեղ եկանք այս ամենին: Ես և նա միանգամից հասկանում ենք՝ ինչ ենք ուզում ստանալ:
- Պլաստիկ վիրահատությունների էլ ես դիմե՞լ։
- Առաջ խոսում էին դրա մասին, բայց այն ժամանակ այդ լուրը չէր համապատասխանում իրականությանը, իսկ հիմա կարող եմ ասել՝ մեկ ամիս առաջ վիրահատել եմ քիթս: Ի դեպ, սրա մասին առաջին անգամ եմ խոսում: Մայրս շատ ծանր տարավ վիրահատությունս, քանի որ ես նրան չէի ասել, որովհետև գիտեի՝ բացասական կարձագանքեր: Երեկոյան գալիս, նայում էր, տեսներ՝ իր աղջիկն է, թե ոչ: Ամեն դեպքում ես մեծացել եմ ավանդական ընտանիքում, և այսպիսի բաները ընդունված չեն: Ես նաև նիհարել եմ 10-16 կգ, դրա համար փոփոխությունը զգալի է: Երբ մի քիչ գեր էի, մտածում էի՝ չարժի անել, բայց երբ նիհարեցի, Արայիկն ասաց՝ պետք է անել:
- Հիմա շատ ավելի նուրբ և կանացի տեսք ունես: Նոր ոճիդ հետ խառնվածքդ և բնավորությունդ էլ է՞ փոխվել:
- Բնավ ոչ: Բնավորությունս երբեք չի փոխվի, կարծում եմ, քանի որ մարդը բնավորությամբ է ծնվում: Բացի այդ՝ չեմ կարծում, որ իմ բնավորությունն այնքան ծանր է, որ պետք է փոխվի: Ես սիրում եմ ինքս իմ վիճակի մեջ լինել և համոզել, որ այդպես ճիշտ է:
- Շոու ծրագրերդ ևս փոխվե՞լ են և արդյոք հանդիսատեսի արձագանքը դրակա՞ն է:
- Իհարկե, ուշադրությունն ակնհայտ է: Ես շատ ակումբներում եմ աշխատել, բայց հիմա երաժշտական առումով էլ եմ փոփոխվել և ուրիշ երաժշտություն եմ ներկայացնում: Սկսել եմ երգել նաև 6/8 ժանրում, ինչը մինչև այս չէի անում: Ես միշտ համարել եմ, որ ես բարձր երաժշտություն ներկայացնող երգչուհի եմ, և ինձ չի սազում նման երգեր կատարելը: Բայց հասկացա, որ դա էլ կարելի է անել՝ իմ ոճում և իմ մատուցմամբ: Դա իմ աշխատանքն է, որով գումար եմ վաստակում, բայց հեռուստատեսությամբ մարդիկ պետք է ունենան այլ կարծիք արտիստի մասին:
- «Նախշուն բաջի»-ին քո վերջին տեսահոլովակն էր, որն այդքան էլ դրական չընդունվեց հայ հանդիսականի կողմից: Ասում են նաև, որ քո ծննդավայրում՝ Արցախում, դժգոհության մեծ ալիք է բարձրացել:
- Անկեղծ ասեմ՝ կարծիքները շատ-շատ տարբեր էին այս երգի վերաբերյալ: Այս երգը կատարել եմ «Արցախի ձայնը» նախագծի ժամանակ և նույն այս ոճի մեջ: Ավելի շատ քննարկվեց տեսահոլովակը, այլ ոչ թե երգը: Երգին ոչ մեկ ոչինչ չասաց: Ինձ համար այս երգի լավագույն տարբերակն իմն է: Այն ստեղծված է, որ մարդիկ լսեն և ուրախանան:
- Առանց համեստություն անելու նշում ես, որ ամենալավը քո կատարումն էր: Չե՞ս վախենում, որ շատերի համար քո ասածը գոռոզություն կթվա:
- Այո՛, այս պարագայում՝ այո: Գիտե՞ք՝ դրա մասին միայն ես չեմ ասում, շատերն են փաստում: Ղարաբաղում արձագանքներ պետք է լինեին, քանի որ ժամանակին ես երգում էի «Արցախի ձայնը» նախագծում և այդ նախագծում այլևս չկամ: Ինձ համար ցավալի են այդ մարդկանց արձագանքները, բայց ամեն դեպքում մարդ են և պետք է արտահայտվեն: Ի դեպ, Ղարաբաղում վերջերս եմ եղել, որտեղ հարսանիքի ժամանակ կատարել եմ «Նախշուն բաջի»-ին, և եթե չսիրեին այդ երգը, չէին էլ ուզի, որ հնչեր:
- Ամեն դեպքում բոլոր քննադատություններն աշխատեցին հօգուտ քե՞զ:
- Միտում չունեինք սև փիառ անելու, պարզապես շատ ավելի համարձակ տեսահոլովակ ստացվեց: Տեսահոլովակում ներկայացված է իմ համարձակության երևի կեսը, բայց երկրպագուներիս և հանդիսատեսին շատ ավելին է սպասվում: Օրեր առաջ Արթուր Գրիգորիչի մոտ էի, նա ինձ փոքր տարիքից էր ճանաչում՝ համեստ երեխա Ղարաբաղից: Նրա կարծիքն ամեն դեպքում ինձ համար կարևոր է: Նա ինձ ասաց՝ քո նման սիրուն երգեցողություն չեն ներկայացրել, և դա ամենամեծ գնահատական է:
- Ժամանակին երգում էիր «Արցախի ձայնը» նախագծում, ասում են՝ քեզ նախագծից հեռացրին վատ վարքի պատճառով:
- Շատ վատ է, որ այդպիսի արտահայտություն է արվել, քանի որ իմ նման նվիրված երգչուհի այդ նախագծում Լիրա Քոչարյանը չի ունեցել: Ես չեմ վախենում այդ արտահայտությունից, որ «Արցախի ձայնի» լավագույն երգչուհին եմ եղել: Ռազմիկ Ամյան, Գայա Արզումանյան, Վարդան Բադալյան․ այս երեքիս մեջ հզորություն կար: «Արցախի ձայն» նախագիծը մեր տունն էր, ես մինչ օրս էլ նրանց վատ չեմ վերաբերվում: Ֆրանսիայի մեր համերգից հետո ես ասացի Լիրա Քոչարյանին, որ դուրս եմ գալիս նախագծից: Ասաց՝ Գայա, դու պարզապես ասում ես: Երբ հասանք Ղարաբաղ, ասաց անձնագիրդ տուր, Դուբայ ենք մեկնում: Ասացի՝ ոչ, ես նախագծում այլևս չկամ: Շատ ցավալի էր, երբ մի անգամ բեմ բարձրացավ մի երգչուհի, ով իմ ֆոնոգրամայով էր երգում: Ինձ համար դա եղավ շատ ցավալի և հիասթափեցնող: Ես երբեք չեմ մտածել, որ կարող եմ, օրինակ, Ռազմիկ Ամյանի պլյուսի տակ երգել կամ Վարդան Բադալյանի:
- Նախանձողներ ունե՞ս: Եղե՞լ են դեպքեր, երբ փորձել են խափանել ելույթդ:
- Շատ հաճախ: Բայց գիտեք, երբեք չեմ վախեցել այդպիսի բաներից, որովհետև կարող եմ միկրոֆոնը դնել և երգել առանց երաժշտության: Կարող է ամեն ինչ խափանվել, բայց ձայնդ՝ երբեք, որովհետև դա ի վերուստ է տրված: Ուրախ եմ, որ տարբերվող եմ, և ոչ մեկ, երգս լսելով, չի կարող ասել, որ ինչ-որ մեկին նման է: Նախանձ պետք է լինի, և եթե դա չլինի, մենք չենք կարող առաջ գնալ: Չեմ կարող ասել, որ բոլորն ընդունում են մեր ներկայացրած երաժշտությունը, բայց եկեք անկեղծ լինենք՝ Հայաստանում կա մի խումբ, ովքեր սկզբում քննադատում են 6/8-ը, հետո սկսում են երգել և դրանց տակ պարել:
- Դու ի՞նչ երաժշտության տակ ես սիրում պարել։
- Ես սիրում եմ 6/8 ժանրը, որովհետև երբ գնում եմ հարսանիք, պարում եմ դրա տակ: Ես չեմ ընդունում, որ նույն ժանրը լինում է հեռուստատեսությամբ: Հեռուստատեսությունը պետք է լինի որակով երաժշտություն մատուցող միջոց:
- Մի անգամ նշել էիր, որ քո արտաքինի և հագուկապի պատճառով հաճախ ես տղամարդկանց ուշադրության կենտրոնում լինում: Ոչինչ չի փոխվե՞լ։
- Իհարկե ոչ: Բայց հիմա երբեմն ինձ չեն ճանաչում: Փակ հագուստը ինձ վանում է, ես ինձ վատ եմ զգում փակ հագնված ժամանակ: Անգամ աշխատանքի գալիս ես չեմ կարողանում փակ հագնվել: Երբ երկար հագուստ է հագիս, ես ինձ անհարմար եմ զգում, բայց դրանով ինչ-որ բան չեմ ուզում ասել կամ ցույց տալ:
- Տղամարդկանց մասին խոսք գնաց, ասում են՝ կողքիդ տղամարդը վաթսունն անց է:
- Անկեղծ ասած, ես ժամանակ չունեմ իմ անձնական կյանքի համար: Եթե լինի, սրտանց բոլորին կասեմ, կապ չունի՝ լինի վաթսուն, թե քսան տարեկան: Եթե սիրեմ, ամբողջ աշխարհը կիմանա դրա մասին: Ես համարում եմ, որ եթե կինն իր կողքին ունենում է տղամարդ, սիրում է խոսել իր երջանկության մասին: Նման խոսակցություններն ինձ համար տհաճ են, քանի որ չի կարելի մի երգչուհու պատճառով բոլորի մասին նույնը մտածել և համեմատել: Ես ունեմ հարգանք իմ ծնողի հանդեպ, ունեմ դաստիարակություն և ընտանեկան դրվածք, որ իմ կյանքում պետք է լինի մի տղամարդ, ում հետ ես կամուսնանամ:
- Զրույցն ավարտենք ստեղծագործական նորություններով: Ի՞նչ փուլում ես: Կա՞ն նոր աշխատանքներ:
- Հիմա աշխատում ենք Արցախյան հին երգերի ձայնասկավառակի վրա: Մեծ մասամբ երգերը պատրաստ են: Այս ձայնասկավառակը հովանավորում է տիկին Ռիտա Սարգսյանը, ձայնասկավառակում միայն արցախյան երգեր են: Մեր գաղափարն էր, նրա՝ նախաձեռնությունը: Նոր երգ ունեմ, որն արդեն պատրաստ է․ երաժշտության հեղինակը Տիգրան Կարապետյանն է, բառերի հեղինակը՝ Ավետ Բարսեղյանը: Աշխատում ենք ևս երեք երգի վրա՝ մեկը շատ կոմերցիոն է, մյուսն էլ իսպանական մոտիվներով է, դուետ հայտնի երգչի հետ: Ունենք նաև Նյու Յորքից առաջարկ մի շատ հայտնի երգչուհու հետ դուետ կատարելու, որը դեռ քննարկման փուլում է: Ինչպես նաև առաջարկ ունեմ օպերայում գլխավոր դերակատարուհու դերում հանդես գալու, որը ևս քննարկման փուլում է:
Նյութը՝ Սիրանուշ Գրիգորյանի
