Սևակ Ամրոյան. «Ես իմ առաջ խնդիր եմ դրել՝ ճաշակով երգերը բերել կոմերցիոն դաշտ»:

EXCLUSIVE

«Ժողովրդական երգիչ» նախագծի հաղթող Սևակ Ամրոյանն արդեն ութ տարի է երգում և ստեղծագործում է իրեն հարազատ ոճում: Շատերի պես էլ չի ցանկանում փոխել ոճը, քանի որ ինչպես նա է նշում՝ կատարում է այն, ինչ հոգեհարազատ է իրեն: BlogNews.am-ի հետ զրույցում Սևակը խոսել է ինչպես ստեղծագործական նորություններից, այնպես էլ մի քիչ անկեղծացել է անձնական կյանքի մասին: 

- Սևակ, նախ պատմիր առաջին ձայնասկավառակիդ մասին: Քանի՞ երգ է ընդգրկված և ինչպե՞ս ես դրանք ընտրել: 

- Սա իմ թվով առաջին ձայնասկավառակն է՝ կոչվում է «Էլ հետդարձ չկա»: Տասնմեկ երգ է ընդգրկված՝ ժողովրդական, աշուղական, հայրենասիրական, բայց հիմնականում այն երգերն են, որոնք ինձ հոգեհարազատ են: Մոտ մեկ տարի են տևել աշխատանքները. աշխատել եմ Գարեգին Առաքելյանի՝ Գաթա բենդից, Արմեն Սարգսյանի, Մուշեղ Մալյանի և Դեր Հովայի հետ: Ձայնասկավառակում կան երկու զուգերգ՝ Նունե Եսայանի և սփյուռքահայր երգիչ Գառնիկ Սարգսյանի հետ: Չեմ մտածել, որ ձայնասկավառակս կոմերցիոն լինի: 

- Երգչի համար այսօր ձայնասկավառակ թողարկելը կարծես տարիների արված աշխատանքների ամփոփում լինի: Չեմ կարծում, որ վաճառք ես ակնկալում: 

- Իհարկե, չեմ ակնկալում, որ վաճառվելու է և ես դառնալու եմ հարուստ մարդ, բայց սա տարիներիս աշխատանքի ամփոփումն է, և երգչի համար ձայնասկավառակն այցեքարտ է: Ձայնասկավառակս շուտով կլինի խանութներում, բայց ակնկալում եմ, որ արտերկրում էլ կվաճառվի: Շուտով մեկնելու եմ ԱՄՆ և որոշ քանակ հետս կտանեմ: 

- Գուցե մի քիչ կոպիտ է հնչում, բայց ամեն դեպքում այն գումարները որ ներդնում ես աշխատանքիդ մեջ, այդպես էլ հետ չես բերում չէ՞

- Իհարկե այդպես է, բայց ձայնասկավառակ թողարկելը մեծ գումարների հետ է կապված, թե տպաքանակը, թե դիզայնը, մանավանդ, երբ պրոֆեսիոնալ թիմ է աշխատում: Ամեն ինչ իհարկե գումարի հետ է կախված: Իրականում ծախսում  ես այն նպատակով, որ հետո պետք է լավ լինի: Ես իմ առաջ խնդիր եմ դրել, որ ճաշակով երգերը բերեմ կոմերցիոն դաշտ և ես փորձում եմ դա անել:

- Այդ դեպքում, հուշի մնացած երգիչ-երգչուհիներին՝ ի՞նչպես դա անել, քանի որ երաժշտական դաշտում կոմերցիոնը պարզապես խեղդում է արդեն: 

- Իհարկե շատ դժվար է, բայց ես ուրախ եմ, որ ես երգում եմ իմ ոճում, և ինչու ոչ, ես այդ երգերը ներկայացնում եմ խնճույքների ժամանակ: Այսինքն ես փորձում եմ դա բերել կոմերցիոն դաշտ, թե հիմա հետագայում դա ինչպես կստացվի՝ չգիտեմ:

 Սևակ, այն ժամանակ երբ դուք նոր էիք սկսում, բոլորն ասում էին, որ ժողովրդական երգը պահանջարկ չունի և հույս էլ չկա, որ դուք կկարողանայիք առաջ գնալ: Շատերն էլ հասկանալով, որ ժողովրդականը չի կարող կոմերցիոն լինել՝ փոխեցին իրենց ոճը: Սևակ, հիմա պատկերը փոխվել է:

 Ի ուրախություն ինձ այսօր շատացել է ժողովրդական երգի հանդեպ պահանջարկը, հիմա ես ակտիվություն եմ նկատում: 2007 թվականին ես մասնակցեցի «Ժողովրդկան երգիչ» նախագծին և արդեն 8 տարի է երգարվեստում եմ: Պետք է ասեմ, որ այն ժամանակ ավելի դժվար էր և  ասում էին մեղք չեն այս երեխեք, ի՞նչ են անելու նախագծից հետո: Նախագծից հետո բոլորս հայտնի դարձանք, բոլորը մեզ սիրում էին, երգում էին մեր երգերը: Իհարկե դժվար է մնալ ասպարեզում և կայանալը. նախագծից հայտնի դարձաց մյուս մասնակիցները ունեն այդ խնդիրը:  Իհարկե մեծ գումար է պետք՝ տեսահոկովակ նկարահանելու, ձայնասկավառակ թողարկելու, որի մասին խոսք անգամ գնալ չէր կարող, որովհետև չգիտես՝ թե ինչից սկսել: Այս տարիների ընթացքում երբ աշխատեցինք, սկսեցին նախագծերից մեզ նկատել, հեռուստաընկերություններից զանգել, իհարկե գնալով շատացան առաջարկները, որի համար ուրախ եմ:

- Գուցե՞ քո բախտը բերեց, որ ամեն դեպքում այսօր առաջ ես գնում

- Իհարկե, բախտի գործոնն էլ կա, ինչպես նաև ճիշտ մարդկանց հանդիպելը քո ճանապարհին : Օրինակ Սաշ Մհերյանը, ով ինձ շատ է օգնել: Ես այս ութ տարվա մեջ քրտնաջան աշխատել եմ, նկարահանել եմ վեց տեսահոլովակ, շատ երգեր եմ ձայնագրել, բազմաթիվ համերգներ եմ ունեցել արտերկրում, ձայնասկավառակս եմ թողարկել:

- Սևակ, ինչպես ես եմ նկատել, ամեն դեպքում դու շատ չես սիրում խոսել քո մասին, քիչ ես լինում ինչ-որ հաղորդումների հյուր, բայց նախընտրում ես խոսել քո արած աշխատաների մասին:

- Ճիշտ ես նկատել, իրականում կան հաղորդումների ձևաչափեր, որոնք չեմ սիրում, երբ փորձում են խոսել անձնականի մասին, ես ավելի շատ սիրում եմ խոսել իմ աշխատանքների մասին: Եթե անգամ ասելիք չունեմ, չեմ սիրում պարզապես գնալ հաղորդումներին հյուր և ջուր ծեծել: Իհարկե շնորհակալ եմ, այն հեռուստաընկերություններին, ովքեր կանչում են, քանի որ մեծացել է այն հաճախականությունը որ իմ տեսահոլովակները ցուցադրում են և բացարձակ առանց խնդրելու: Ես ուրախ եմ, որ նկատում, տեսնում և հրավիրում եմ, քանի որ դա շատ կարևոր է արտիստի համար: Պետք է նաև շեշտեմ, որ երբեք ոչ մի տեսահոկովակի ցուցադրման  համար գումար չեմ վճարել. միգուցե գնահատվել է այն աշխատանքը, որ այս տարիների ընթացքում արել եմ:

- Ասացիր, որ չես սիրում անձնականի մասին խոսել, սա փոքր ակնարկ էր՞ ինձ, որ ոչինչ չհարցնե՞մ: Ամեն դեպքում չես էլ կարող առարկել, որ շատ հաճախ արտիստի համար անձնական կյանքը հաջող ՓՌ է դառնում:

- Ես չեմ ուզում այդպիսի ՓՌ, դա էլ ինձ համար սկզբունքի հարց է: Եթե այդպես պետք է ավելանա իմ մասին լուրերը և տեղեկությունը, ապա ես չեմ ուզում: Պետք է ավելացնեմ, որ այս հարցում խնդիրներ եմ ունեցել, երբ հաղորդումներից մեկի ժամանակ հարցրեցին ընկերուհի ունեմ թե՞ չէ, ես էլ պատասխանեցի՝ ոչ: Իսկ նախկին ընկերուհիս վիրավորվեց իմ պատասխանից: Հասկանում եք, ես պարզապես մտածում եմ, որ դա միայն իմ կյանքի էջն է և լուրջ մարդկանց հետաքրքիր չէ: Օրինակ բերեմ՝ ես Սթինգի մեծ երկրպագուն եմ, բայց ես անգամ չգիտեմ, նա ամուսնացած է թե՝ ոչ:

- Երևանում համերգային ակտիվություն եմ նկատում, եթե առաջ քիչ էր, ապա հիմա արդեն ամեն դեպքում երեք երգիչ մենահամերգ ունեցավ, չնայած հայ երգիչներից ոմանք նախընտրում են իրենց առաջին մենահամերգն անել ԱՄՆ-ում: Դու մոտ ապագայում ունե՞ս այդպիսի պլաններ:

- Հիմա ամբողջ նպատակս մենահամերգն է, եթե այս աշնանը չանեմ, ապա մյուս տարի: Դա մեծ աշխատանք է և ես չեմ ցանկանա դա պարզապես անել, անելու համար:  Սա իմ առաջին մենահամերգն է լինելու, ուզում եմ, որ լավ անցնի:

- Երգիչ-երգչուհիների մոտ կարծես մենահամերգը մրցակցության պես մի բան լինի: Հաճախ եմ լսում, երբ ասում են, ես աննախադեպ համերգ պետք է անեմ, որ նմանը չունեցող լինի:  Քոնն էլ է տարբերվելու

- Ինձ համար ծիծաղելի են այդ խոսքերը, ով էլ կասի՝ կծիծաղեմ: Կարծում եմ՝ արդեն ամեն ինչ արված է, կարելի է ինչ-որ օրիգինալություն փնտրել այդ ամենի մեջ, բայց որ ասես, տեխնիկապես կփորձես ինչ-որ մեկին զարմացնել՝ այլևս չես կարող: Այսօր շատ քիչ բան կա, որով կարող ես զարմացնել հանդիսատեսին, պետք է շեշտը դնել երգացանկի և երաժշտական օրիգինալության վրա: Իմ կարծիքով հոգևոր սնունդն է կարևոր, քանի օրինակ յոթ հատ լույս ավել դնելը. զարգացած և երաժշտասեր մարդուն չես զարմացնի ճոխ լույսերով: 

- Սևակ, քո մասին հաճախ ասում են, որ քո երգերը լավն են, բայց դու միշտ տխուր ես: Օրինակ՝ մտածել ես՞ ժողովրդական ռիթմիկ երգ ունենալ, որ գուցե այդ տեսակետը կոտրվի:

- Իհարկե շատ եմ լսում այդ մասին, բայց դա պատահական է ստացվել,  այնպես չէ, որ պարտադիր եմ անում: Ես պարզապես այն երգերը որոնք ընտրել եմ, եղել են լիրիկ, ես էլ ինձ միշտ այդ ժանրում եմ պատկերացրել: Այս տարիների ընթացքում հարյուրից ավելի երգ եմ երգել, երևի միայն տասն է եղել ռիթմիկ, իրականում դա վատ է, քանի որ ժողովուրդը քեզ սկսում է այդպես ընդունել: Հաճախ ինձ գրում են, զանգում և հարցնում՝ դուք ուրախ երգ ունե՞ք: Իհարկե ունեմ, ես մասնակցում եմ նաև խնճույքների: Հիմա ստուդիայում ռիթմիկ երգ եմ ձայնագրում և  աշխատում եմ այդ ուղղությամբ, որ ունենամ մի քանի ավելի ռիթմիկ երգեր: 

- Սևակ, իսկ  ի՞նչ նախասիրություններ ունես:

- Ընկերներիս հետ եմ սիրում ժամանակ անցկացնել, վերջին շրջանում շատ զբաղված էի՝ կապված ձայնասկավառակիս աշխատանքների հետ: Կուզեմ մի քիչ հանգստանալ, բայց շրջագայությունների ընթացքում հասցնում եմ մի քիչ հանգստանալ: Օրինակ՝ վերջերս Լիբանանում էի, այնտեղ շատ դուրս եկավ: Վերջերս հիանում եմ քամանչա գործիքով, և արդեն սկսել եմ դասերի գնալ վարպետի մոտ: Որոշել եմ ինձ համար սովորել, իսկ գործիքը նվեր եմ ստացել իմ լավ ընկերոջ կողմից: Կուզեմ հետագայում ինչ-որ երգի ժամանակ ինձ նվագակցեմ: Սիրում եմ նաև քաղաքից դուրս գնալ, ինքս ինձ բնության մարդ եմ համարում: Սիրում եմ մեծ թենիսով զբաղվել, վերջերս էլ մարզասրահ եմ հաճախում:

- Իսկ ի՞նչ է քեզ պակասում: 

- Ես մեծ-մեծ երազանքներ ունեմ, իմ էությամբ էլ երազկոտ մարդ եմ: Շատ-շատ ցանկություններ ունեմ կարիերայի առումով, հիմա շեշտը չեմ դրել անձնականիս վրա: Ուզում եմ  կայանալ, այնպես որ ես ինձնից բավարարված լինեմ: Ուզում եմ շատ համերգներ լինի, քանի որ իմ կյանքում լիարժեք բավարարվածություն միայն իմ աշխատանքն է տալիս:

- Ընտանիքիդ անդամները չեն ասում, ե՞րբ ես ամուսնանալու

- Ասում եմ՝ դեռ սպասեք: Իմ կարծիքով՝ մարդ պետք է կայանա ամեն առումով,  ոչ թե ամուսնանա, հետո նոր կայանա:  

- Քո պահանջները աղջիկների հարցում շատ ե՞ն

- Ես հատուկ պահանջներ չունեմ, ես մարդուն նայում եմ ընդհանուր:  Պարզապես պետք է լինի կրթված, պահել իմանա հասարակության մեջ: Ամեն ինչից էլ պետք է մի քիչ միչ քիչ լինի: Կյանքը ցույց կտա, թե ինչ կլինի հետագայում: 

Նյութը՝ Սիրանուշ Գրիգորյանի

Լուսանկարները՝ Կարեն Հովհաննիսյանի