Tert.am-ը գրում է.
Այսօր ՀՀ բնապահպանության նախարար Արամայիս Գրիգորյանը Ֆինանսավարկային և բյուջետային մշտական հանձնաժողովի և գյուղատնտեսական և բնապահպանական հարցերի մշտական հանձնաժողովների համատեղ նիստում ներկայացրեց 2015 թվականի բյուջեի կատարողական հաշվետվությունը:
Նա նշեց, որ 2015 թվականին ընդհանուր առմամբ Բնապահպանության նախարարության գծով պետական բյուջեն կատարվել է 98.4 տոկոսով: Ծրագրավորված 3 միլիարդ 172 միլիոն 900 հազար դրամի դիմաց փաստացի կատարողականը կազմել է 3 միլիարդ 694 միլիոն դրամ, որն ավելի է 2014 թվականի ցուցանիշից 34.7 տոկոսով:
«Բյուջեի կատարողականը նախարարության մասով կազմել է 99 տոկոս, թերակատարումը պայմանավորված է եղել ծրագրերի փաստացի կատարողականի, գնումների գործընթացի շրջանակներում ձեռք բերված տնտեսումների հետ»,- ասաց նա և հայտնեց, որ 2015 թվականի գնումների գործընթացի շրջանակներում տնտեսվել է 21 միլիոն 600 հազար դրամ բյուջետային միջոց:
