Tert.am-ը գրում է.
Կոտայքի մարզպետ Կարապետ Գուլոյանն ԱԺ-ում լրագրողների հետ զրույցում պնդեց, թե մամուլի հրապարակումները, թե մարզպետարանն Արցախի համար հավաքված գումարներն օգտագործել է Հրազդանի ընտրությունների ընտրակաշառքների համար, չեն համապատասխանում իրականությանը:
«Մեզ մոտ նախ ընտրակաշառք չի եղել, հետո էլ ո՞վ կարող է նման բան անել, Արցախի մեկ լուման ուտել, դա բարոյական մարդու արա՞րք է, հայ կոչվելու իրավունք ունի՞այդ մարդը»,-ասաց նա:
Գուլոյանն անդրադարձավ Գառնու բնակիչների պահանջին և նշեց, թե Կառավարության ղեկավարը եկավ, իր դիրքորոշումը հայտնեց, որոշումը կայացրեց, և ինքն էլ պարտավոր է ինչ որոշում կայացվել է՝ կատարի: Նշենք, որ վարչապետը համաձայնեց չեղարկել Ազատ գետի ջրերն Արարատի մարզի գյուղերի դաշտերը ոռոգելու ծրագիրը:
Իսկ թե ինչու մինչ այդ գառնեցիների խնդրին ականջալուր չի եղել և փորձել է ծրագրի դեմ պայքարել՝ Գուլոյանն ասաց, որ ծրագիրը ոչ մի կապ չունի մարզպետարանի հետ, բայց պնդեց, թե ինքը ևս հանդիպել էր գառնեցիների հետ, նարցն խնդիրը հասցրել համապատասխան մարմիններին:
Հարցին, թե Կոտայքի մարզպետարանը ևս կմիանա վարչապետի հանձնարարականին և կրճատումների կգնան՝ մարզպետը պատասխանեց, թե ոչ մի հանձնարարական դեռևս չունեն: Ըստ նրա՝ մարզում 8 ծառայողական մեքենա կա, և եթե վարչապետի հանձնարարականը լինի, ուրեմն, կկրճատեն նաև դրանց թիվը:
«Կարևորը կարևոր է, ուղղակի եթե հիմա հանձնարարություն կա, ֆինանսական խնդիրներ կան, ընդհանուր հանրապետությունով մեկ, որ պետք է բոլորս միասին այդ հարցերը լուծենք, ի՞նչ է հո ինձ չեն առանձնացնելու»,-շեշտեց մարզպետը:
