Կապ չունի դու ով ես
Հայտնագործություն չեմ անի եթե ասեմ, որ կան բաներ, որոնց առաջ բոլոր մարդիկ հավասար են: Օրինակ՝ էկոլոգիան ու անվտանգությունը: Կապ չունի դու ով ես, հարուստ թե՞ աղքատ, երիտասարդ թե՞ տարեց, կին թե՞ տղամարդ, պաշտոնյա թե՞ բանվոր, գործազուրկ թե՞ գործարար: Մեկ է, եթե էկոլոգիան աղտոտված է, այն հավասարապես ազդում է բոլորս վրա: Քաղցկեղը և մյուս հիվանդությունները չեն հարցնում թե դու ո՞վ ես, կամ ո՞վ ես եղել: Դրա օրինակները յուրաքանչյուրս զգացել ենք ու տեսել:
Նույնը անվտանգությունն է. ներքին, առավել ևս արտաքին: Բոլորս պետք է ի վերջո հասկանանք, եթե մենք մեր քայլերով, գործողություններով, արածով կամ հատկապես չարածով ազդում ենք անվտանգության վրա, հավասարապես տուժելու են բոլորը՝ կապ չունի թե ով ով է: Այնպես որ վաղուց արդեն սթափվելու ժամանակն է և գիտակցելու, որ կան բաներ, որոնց առաջ բոլոր մարդիկ հավասար են, հետևաբար բոլորը պետք է ամեն ինչ անեն, որ այդ վտանգները հասցվեն նվազագույնի:
