Դերասանուհի Աննա Դավթյանը ամուսնությունից հետո տեղափոխվել է Մոսկվա։ Դերասանուհին, ով իրեն նվիրել է ընտանիքին, BlogNews-ին պատմել է ընտանեկան առօրյայի մասին, ինչպես նաև հայտնել, որ տևական դադարից հետո պատրաստվում է վերադառնալ աշխատանքի։
«Շուտով 3 տարի կլինի, ինչ ինձ ամբողջությամբ նվիրել եմ ընտանիքիս, բայց հիմա արդեն նորություններ են սպասվում»,- նշեց դերասանուհին, սակայն առայժմ չցանկացավ բացահայտել, թե գործնական ինչ նորություններ են սպասվում։
Անդրադառնալով ընտանիքին՝ Աննան նշեց, որ փոքրիկի ծնունդն ամեն բան փոխել է. «Ձագուկս շատ աշխույժ և ժիր է։ Ադելի ծննդից հետո մեր ընտանեկան երջանկությունը դարձել է լիարժեք։ Անպայման ուզում ենք երկրորդ երեխա էլ ունենալ, սակայն ոչ հիմա։ Երկրորդ երեխայի ծնունդը ծրագրում ենք այն ժամանակ, երբ հոգսառատ առօրյաս մի քիչ թեթևանա, Ադելս ինքնուրույն դառանա։ Երբ ծնվում է երկրորդ փոքրիկը, առաջին երեխան ավելի քիչ ուշադրություն և խնամք է ստանում»։
Դերասանուհու դուստրը շուտով 2 տարեկան կդառնա։ Մայրիկը պատմեց, որ նա շատ է սիրում երգել ու պարել։ «Մենք նույնիսկ մի քանի զուգերգ ունենք։) Նա ունի սիրելի երգեր, տեսահոլվակներ, որոնք ամեն օր պարտադիր դիտում է։ Վերջին տեսահոլովակը, որը շատ է սիրում Ռազմիկ Ամյանի «Չունի աշխարհը քեզ նման»-ն է, որի ռեժիսորը մեր փեսան է՝ Կարեն Ամյանը»,- ասաց Աննան ու հավելեց, որ փոքրիկ Ադելը լսում է գրեթե ամեն տեսակի երաժշտություն՝ ժողովրդական երգերից, դասական երաժշտությունից մինչև էստրադային կատարումներ։
Ըստ Աննայի՝ դուստրն արդեն բավականին ձևավորված բնավորություն ունի, ընդ որում՝ նման է թե՛ իրեն, թե՛ ամուսնուն. «Ինձ պես երաժշտական է, լավ լսողություն ունի, դիմացկուն է, ամուսնուս պես ամուր բնավորություն ունի և ճարպիկ է»։
Դերասանուհին նշեց, որ ուշադիր և բծախնդիր է երեխայի խնամքի հարցում, սակայն չափի մեջ։ Սկեսուր մայրիկն էլ միշտ պատրաստ է օգնել իրեն, երբ կարիք է լինում։
Ինչ վերաբերում է մոսկովյան կյանքին ադապտանալուն՝ Աննան նշեց, որ արդեն հարմարվել է այնտեղի կյանքին, միակ բարդությունը կարոտն է ընտանիքի, ընկերների և հայրենիքի հանդեպ։ «Չեմ հոգնում կրկնել Սարոյանի «Իմ սիրտը լեռներում է» խոսքերը, իսկ մյուս հարցերում արդեն հարմարվել եմ. որտեղ ընտանիքս է, այնտեղ էլ՝ ես»։
Նյութը՝ Ամալյա Հովհաննիսյանի
