Մաշտոցի 37 հասցեում (Թումանյան-Սպենդիարյան խաչմերուկում) գործող ֆրանսիական փոքրիկ անկյունը՝ «Avenue 37»-ը, այսօրվանից արդեն գործում է և պատրաստ է ընդունելու բարի, ժպտերես, դրական ու հետաքրքիր մարդկանց:)
Սրճարանում կան տարբեր անկյուններ՝ ինտրովերտի անկյուն, ուր կարելի է գնալ միայնակ ու խորասուզվել մտքերի մեջ, ռոմանտիկ անկյուն սիրահարների համար և, ի վերջո, հարմարավետ անկյուն ընկերական հանդիպումների համար: Երկրորդ սրահում փոքրիկ գինետուն է, որտեղ կարող եք վայելել տարբեր երկրների համեղ գինիներ:
Երեկ՝ «Avenue 37»-ի պաշտոնական բացմանը, ներկա էին մի շարք հայտնի մարդիկ՝ Գրիգոր Դանիելյանը կնոջ՝ երգչուհի Հռիփսիմե Ելինյանի հետ, Գարիկ Սեպխանյանը, Վահե Խանամիրյանն ու Լիլիթ Մուրադյանը, Էթերի Ոսկանյանը, Դիանա Շատվերյանն ամուսնու հետ, Արտակ Վարդանյանը, Գագիկ Շամշյանը, Աննա Խաչատրյանը, Լիանա Տեր-Մինասյանը, Էռնա Էլիզբարյանը, Աննա Գևորգյանն ամուսնու՝ Վլադի հետ, Մարինա Գրեգը, Էմմա Հակոբյանը և այլք: Սրճարանի բացմանը ներկա էր նաև օպերային երգչուհի Մագդա Մկրտչյանը, ով առաջինը փորձարկեց «Avenue 37»-ի դաշնամուրը՝ նվագեց, երգեց, այնուհետև նրան միացավ հյուրերից մեկ ուրիշը՝ Սերոբ Անտինյանը: Մի խոսքով՝ բացմանը բարի մթնոլորտ էր, որը միշտ լինելու է «Avenue 37»-ում, չէ՞ որ այստեղի յուրաքանչյուր այցելու դառնում է բարեգործ, քանի որ սրճարանի ամբողջ շահույթն ու թեյավճարներն ուղղվելու են անապահով ընտանիքների համար Ավանում գործող բարեգործական ճաշարանին:
Հայտնիներից հետաքրքրվել ենք, թե ինչ տպավորություններ ունեն «Avenue 37»-ից:
Գրիգոր Դանիելյան
Մենք ընդամենը 2 օր առաջ ենք բացել «Ֆուլ հաուս» սրճարանը և արդեն մասնագետի աչքով եմ նայում այս ամենին, «կեղտ» եմ ման գալիս ու չեմ գտնում:) Ամեն ինչ տեղը տեղին արված է: Ինտերիերը շատ գեղեցիկ է, գինիների անկյունն ինձ շատ դուր եկավ: Կարելի է ասել՝ նաև ստեղծագործական մթնոլորտ է: Գուցե այստեղ մեզ տեսնեք «Ֆուլ հաուսի» սցենարները գրելիս:) Ուրախ եմ, որ նման նախաձեռնություն կա, և որ ամենակարևորն է՝ բարեգործական նպատակով է արվել: Կարծում եմ՝ ճիշտ կծառայի իր նպատակին, այնպիսի մարդիկ են կանգնած այս ամենի հետևում, որ վստահ եմ՝ այդպես էլ լինելու է:
Էթերի Ոսկանյան
Սուպեր գաղափար է. տա Աստված, որ շարունակական լինի: Ես ուրախ եմ, որ BlogNews-ը որոշել է կազմակերպել այս ամենը: Ինքս հաճախ կգամ այստեղ ու խորհուրդ կտամ ընկերներիս գալ այստեղ: Տեղը հրաշալի, հարմարավետ, բարի մթնոլորտով է: Շատ կարևոր է, որ հիմա սկսել են ուշադրություն դարձնել այն բանին, որ մարդկանց պետք է օգնել:
Վահե Խանամիրյան
Շատ ուրախ ենք, որ սրճարանը բարեգործական բնույթի է: Մեր այցելության հիմնական շարժառիթը հենց դա էր: Հետագայում հաճախ պետք է գանք այստեղ, պատվերներ անենք, ժամանակ անցկացնենք, որպեսզի նաև մեր օգնությամբ «Avenue 37»-ը ծառայի իր նպատակին: Վայրն էլ շատ հաճելի ու գեղեցիկ է:
Աննա Գևորգյան
Շատ հավես մթնոլորտ է, ինձ շատ դուր եկավ: Ինձ շատ հարմարավետ եմ զգում այստեղ: Սովորաբար այսպիսի տեղեր մտնելուն պես ուզում եմ դուրս գալ, վերադառնալ իմ տուն, սակայն հիմա ինձ շատ լավ եմ զգում, ուզում եմ էլի մնալ, հետո նորից գալ:)
Դիանա Շատվերյան
Շատ լավ միջավայր է ստեղծվել, ուրախ եմ, որ նման գեղեցիկ վայր բացվել է հենց իմ հարևանությամբ: Ես պարտադիր կլինեմ «Avenue 37»-ի մշտական հաճախորդներից մեկը: Շատ ուրախ եմ, որ կան մարդիկ, ովքեր մտածում են անապահով ընտանիքների մասին, ողջունելի նախագիծ է և էստեղ հաճախ ժամանակ անցկացնելու էլ ավելի մեծ ցանկություն է առաջացնում:
Արտակ Վարդանյան
Ինձ ամեանաշատը դուր է գալիս այն գաղափարը, որ այդտեղ ֆեյսբուքահայությունը կհանդիպի Արամին և Կոնստանտինին, կամ եթե BlogNews-ում վատ հոդված լինի, աստղերը Արամին և Կոստյային «բռնացնելու» տեղ կունենան:) Սա, իհարկե, որպես հումոր։
Միանշանակ, վերջին շրջանի ամենալավ նախաձեռնություններից մեկն է, որի նմանը մենք չենք ունեցել: Կուզենամ, որ մեր երկրում բոլորն այնքան լավ ապրեն, որ բարեգործության կարիք չլինի, բայց քանի որ այդպես չէ, մաղթում եմ, որ այս դռները երբեք չփակվեն:
Ինձ դուր եկան բոլոր անկյունները, սակայն, ինչպես բոլորը նշում են, մի օր ես էլ եմ անպայման լինելու առանձին անկյունում: Առավոտյան 9-ին կզանգահարեմ ու կպատվիրեմ տեղը, թե չէ, վստահ եմ, հետո զբաղված է լինելու:)
Մագդա Մկրտչյան
Շատ տպավորված եմ. տարիներ առաջ Փարիզում էի, և այստեղի միջավայրն ինձ ստիպեց հիշողությունների գիրկն ընկնել: Ես արդեն սիրահարվել եմ «Avenue 37»-ին, անպայման կրկին կլինեմ այստեղ: Իսկ երբ տեսա դաշնամուրը, չկարողացա դիմակայել, սկսեցի նվագել:) Մեծ բավականություն ստացա:
Էռնա Էլիզբարյան
Ինձ շատ դուր եկավ. շատ ճաշակով, մոդեռն, տրամադրող գույներով ու նկարներով տեղ է: Նախաձեռնությունն էլ շատ գովելի է, քանի որ ամբողջ շահույթն ուղղվելու է բարեգործության: Շնորհավորում եմ:
Նյութը՝ Ամալյա Հովհաննիսյանի
Լուսանկարները՝ Կարեն Հովհաննիսյանի
