Tert.am-ը գրում է.
Ազգային ժողովի արտաքին հարաբերությունների մշտական հանձնաժողովի նախագահ Արտակ Զաքարյանը Tert.am-ի հետ զրույցում տեսակետ հայտնեց, թե ՀՀ-ԵՄ նոր շրջանակային պայմանագրի ստորագրելու հարցում չի կարելի թերահավատ լինել միայն Հայաստանի մասով:
«Այստեղ միայն Հայաստանի գործոնը չի և՛ Հայաստանի, և՛ ԵՄ հարաբերություններն այլ օժանդակ խնդիրներ են իրենց մեջ պարունակում, և անձամբ ես հույս ունեմ, որ մեկ տարվա ընթացքում մեզ կհաջողվի դա անել, բայց այդպես պնդել և 100% վստահությամբ ասել, որ այո, մենք այսինչ օրը կունենաք այսինչ տեսքով արդեն պատրաստի բանակցված փաստաթուղթ, իհարկե իրատեսական չէ»,- ասաց նա:
Արտակ Զաքարյանի խոսքով՝ դժվարության հանդիպելու խնդիր չկա: «Դա մեկ գծանի գործողություն չի, կամ մեկ անհայտով հավասարում, որ դնենք և լուծեք: Մեր նպատակն է հարաբերությունները խորացնել և ընդլայնել ԵՄ-ի հետ՝ համարելով, որ ԵՄ-ն մեր լավագույն գործընկերներից մեկն է: Ունենք նաև օրակարգ, այդ օրակարգը իրավական տեսքի բերելու համար և պայմանագրով ամրագրելու համար սկսվել են բանակցություններ: Հիմա շատ բաներ կարող է նաև ԵՄ-ի տարածքում փոխվել»,- ասաց նա:
ՀՀԿ պատգամավորը հույս հայտնեց, որ բանակցային աշխատանքներում առավելագույնը կհաջողվի. «Հաշվի առնելով նախորդ տարիների փորձը, թիմերի ձեռք բերած հմտությունները և շատ խնդիրների համար պարզեցված իրավիճակները և նաև հաշվի առնելով, որ դեռևս շատ խնդիրներ կարող են ի հայտ գալ՝ անվտանգության, ահաբեկչության պայքարի և այլն, բանակցողները պետք է փորձեն, որպեսզի հաջողվի առավելագույնը »:
Իսկ թե բանակցային փաստաթուղթն արդյո՞ք ներառում է այն, ինչ սպասում էին՝ պատասխանեց, թե նայած ով ինչ էր սպասում: «Բանակցությունների սեղանին կդրվեն մի փոքր տնտեսական և առևտրային ոլորտին առնչվող հարցեր, բայց հիմնականում հումանիտար ոլորտի, ժողովրդավարության և իրավական ոլորտի խնդիրներ կլինեն»,- ասաց նա: