(Ի պատասխան Երևանի կենդանաբանական այգու աշխատակիցների «բողոք-նամակին»)
Հերթական անգամ «Երևանի կենդանաբանական այգի» ՀՈԱԿ-ի տնօրեն Ռուբեն Խաչատրյանը փորձում է խուսափել պատասխանատվությունից: Սակայն ուշագրավն այն է, որ մինչ այս նա թաքնվում էր նախկին տնօրեն Սահակ Աբովյանի ետևում, իսկ այս անգամ կարծես փոխել է մարտավարությունը` փորձում է թաքնվել արդեն այգու աշխատակիցների թիկունքում:
Ակնհայտ է «բողոք-նամակի» հեղինակը հենց Ռուբենն է, քանի որ այն ինչպես միշտ պարունակում է ակնհայտ կեղծ ու ստահոդ տեղեկություններ` չգիտես ինչու այգու աշխատակիցներն են վիրավորվել, մեր կողմից բարձրացված այն հարցի շուրջ, որ այգու տնօրինությունը մեկ շաբաթ բացարձակ չի ներկայանում աշխատանքի և այգին մատնել է անտերության:
Բնականաբար, մենք ծանոթ ենք Ռուբենի այս աշխատելաոճին: Այդպես էլ այս տղան չտարբերեց աշխատանքը հիմնադրամում և պետական կազմակերպությունում, չհասկացավ, որ կեղծ ու շինծու փաստաթղթերով ու հերյուրանքներով կազմակերպություն չեն ղեկավարում, առավել ևս աշխատակիցներին միմյանց դեմ չեն տրամադրում` օգտագործելով ահաբեկման կամ դրամային պարգևատրման ստոր տեխնոլոգիաները.
1. «Բողոք-նամակ» կոչվածը հասցեատեր չունի, թե ո՞ւմ է այն ուղղված, նույնիսկ Ռուբենն ինքը պատկերացում չունի:
2. «Բողոք-նամակ» կոչվածը աշխատակիցները ստորագրել են ստիպողաբար: Ինքնաբուխ գրությունները սովորաբար ստորագրվում են առանց հերթականության և ձեռագիր, իսկ այս դեպքում հստակ պահպանված է տաբելային ստորագրման սկզբմունքը:
3. Ցավալի է հիշողությունները թարմացնելը, երբ տեսնում ես, որ այգու նվիրյալ աշխատակիցներից միայն 8-ն են մնացել, սակայն դա էլ բավական էր, որպեսզի նման անգրագետ նյութ չստեղծվեր:
Սակայն, ինչպես ասում է ժողովրդական խոսքը. «Չկա չարիք, առանց բարիք»: Այն, որ այս «տնօրեն» կոչվածը, որն այգում եղած-չեղած մի հաշիվ է, ի վերջո հասկացավ, որ կեղծ ու շինծու փաստաթղթեր ստեղծելով, ուշ թե շուտ պատասխանատվություն է կրելու դատարանի առաջ՝ խայտառակ լինելով ամբողջ հանրապետության առջև: Սակայն ցավալին այն է, որ այս անգամ նա կարողացել է օգտագործել այգու աշխատակիցներին իր կեղտոտ գործի շարունակականությունը ապահովելու համար:
Հարգելի կենդանաբանական այգու աշխատակիցներ,
Դուք գիտեք, որ մեր խնդիրը անձնական չէ: Խնդիրը այս տնօրենին դատարանի առաջ պատասխանատվության ենթարկելն է, Ձեզ հայտնի, իր կողմից թույլ տրված ապօրինությունների ու անօրինությունների համար: Կիսում եմ նաև Ձեր մտահոգությունը` վաղվա աշխատանք ունենալու կապակցությամբ, սակայն լավ կլիներ՝ թարմացնեք Ձեր հիշողությունը ու հիշե՜ք բոլոր տնօրենամետ աշխատակիցներին, և որտեղ են նրանք հիմա:
«Հին ընկերները չեն դավաճանում»:
Ա. Գալստյան
Հ.Գ.
Այս պահին Ավան և Նոր Նորք վարչական շրջանների ընդհանուր իրավասության դատարանում «Երևանի կենդանաբանական այգի» ՀՈԱԿ-ը հանդիսանում է պատասխանող կողմ նույն կազմակերպության նախկին աշխատակից Ա. Գալստյանի հայցադիմումի համաձայն` տնօրեն Ռուբեն Խաչատրյանի անօրինական, կեղծ ու շինծու հրամանների ստեղծմամբ աշխատանքից ազատելու կապակցությամբ հարուցված քաղաքացիական գործի շրջանակներում:
