Արամ MP3-ը համալրեց հայկական շոու բիզնեսի բիզնեսմենների շարքերը։ Երեկ Նալբանդյան 37 հասցեում բացվեց «Կրեատիվ դեկոր» դիզայնի խանութը, որը տարբեր միջոցառումների համար վարձակալության է տալիս դեկորացիաներ։
Արամը ոգևորությամբ կտրեց ժապավենն ու ընկերներին, հարազատներին հրավիրեց ցուցասրահ։ Արամին շնորհավորելու էին եկել նաև հայտնի գործընկերները՝ Գարիկը՝ կնոջ հետ, Արմուշը, Ռաֆոն, Սերժոն, Մանո Գրիգորյանը, Արայիկ Գաբաջյանը, Էրիկը, Սամվել Գրիգորյանը և այլք։
Բացման խոսքը վստահված էր հաղոորդավար Ավետ Բարսեղյանին: Վերջինս նշեց, որ յուրաքանչյուր ոք, ով շփվել է «Կրեատիվ»-ի և Արամ MP3-ի հետ, գիտի, որ այն, ինչ իրենք են անում, միշտ բարձրաճաշակ է։ Երեկոյի երաժշտությունն ապահովում էր dj Smoke-ը։
Արամը բիզնեսը սկսել է ընկերների՝ Տիգրան Գալուստյանի և Դիանա Շատվերյանի հետ։ «Առաջին անգամ եմ բիզնես սկսում։ Ընկերներիս հետ որոշոցինք գեղեցիկ մի բան ստեղծել, միտքը հետաքրքիր էր, կարծում եմ՝ կարդարացնի իրեն։ Դիզայնով զբաղվում է Մուշեղ Պողոսյանը, ով այս ամենին կյանք է տվել»,- BlogNews-ի հետ զրույցում ասաց Արամը։
Հումորիստը նշեց, որ շոոուբիզնեսային եկամուտները բավարարում էին, սակայն, ինչպես բոլորը, ինքն էլ ավելի շատ գումար վաստակելու ցանկություն ունի։ «Եթե ունեի դրա հնարավորությունը, ինչու ոչ,- ասաց Արամն ու հավելեց, որ այս բիզնեսով հիմնականում կինն է զբաղվելու։ -Ինձանից ավելի շատ ժամանակ խլեցին նախապատրաստական աշխատանքները։ Այս ամենը կազմակերպելու համար պահանջվեց մի ամբողջ ամառ։ Հիմա արդեն կզբաղվեմ իմ աշխատանքներով»։ Երգչից տեղեկացանք, որ շուտով նոր տեսահոլովակ է նկարահանելու։
Նյութը՝ Ամալյա Հովհաննիսյանի
Լուսանկարները՝ Կարեն Անտինյանի
