Tert.am-ը գրում է.
Թաիլանդի ոստիկանությունը հաստատել է Բանգկոկում տեղի ունեցած ահաբեկչության գործում ազգությամբ թուրք Ադեմ Քարադաղի անմիջական, չմիջնորդավորված մասնակցությունը, հայտնում է «Ինտերֆաքս»-ը։
«Հաստատված է, որ Ադեմն է եղել դեղին մարզաշապիկով տղամարդը, որին տեսել էին տեսահսկման տեսախցիկների ձայնագրություններում, այդ մասին հայտնել են թե՛ ականատեսները, թե՛ ինքն անձամբ»,-ասել է ոստիկանության ներկայացուցիչ Խրայուտ Տավորնսիրին։
Ոստիկանության տվյալներով՝ այն բանից հետո, երբ նա պայթուցիկ սարք է տեղադրել, մոտո-տաքսի է վերցրել և մոտակա այգիներից մեկում փոխել մարզաշապիկը։
Ադեմ Քարադաղը ձերբակալվել է Բանգկոկի հարավային մասում՝ անցյալ ամսվա վերջին։ Նրա տանը հայտնաբերվել էին նյութեր, որոնք անհրաժեշտ են պայթուցիկ սարքի պատրաստման համար, ինչպես նաև՝ տասնյակ կեղծ անձնագրեր։
Պայթյունը որոտացել էր Բանգկոկի կենտրոնում՝ օգոստոսի 17-ին՝ զբոսաշրջիկների սիրելի տաճարներից մեկի մոտակայքում։ Ահաբեկչության հետևանքով զոհվել էր առնվազն 20, վիրավորվել՝ 180 մարդ։