GalaTV.am-ը գրում է.
Գերման Ստերլիգովի փաստաբան Արթուր Հայրապետովը հայտարարել է, որ Ինտերպոլը դադարեցրել է ռուսաստանցի գործարարի նկատմամբ հետախուզումը,-հաղորդում է «ՌԻԱ Նովոստի» գործակալությունը:
«Ինտերպոլը հետախուզում չի հայտարարում այն անձանց նկատմամբ, ովքեր հետապնդվում են քաղաքական դրդապատճառներով: Հանձնաժողովը Ստերլիգովի նկատմամբ Ադրբեջանի հետապնդումը համարել է հենց այդպիսին: Մոտ 10-15 օր նրա անունը հայտնվել է Ինտերպոլի բազայում, սակայն հետախուզումն արդեն դադարեցվել է»,- հայտնել է փաստաբանը:
Հայրապետովը նշել է նաեւ, որ մինչեւ օգոստոսի 29-ը իր պաշտպանյալը կմնա Լեռնային Ղարաբաղում: Այդ օրը նա մտադիր է այնտեղ մեծ միջոցառում կազմակերպել` իր կնոջ`Ալյոնա Ստերլիգովայի նորաձեւության տան ցուցադրությունը եւ ղարաբաղյան նժույգների մրցավազքը:
Հիշեցնենք, որ Բաքուն գործարարի նկատմամբ Ինտերպոլի գծով հետախուզում էր հայտարարել հուլիսի 28-ին` «պետական սահմանը հատելու եւ պետության դեմ բացահայտ կոչեր հնչեցնելու» մեղադրանքով:
Ստերլիգովը`խոսելով տարբեր մեղադրանքներով իր դեմ հարուցված քրեական գործերի մասին` նշել էր. «թքած ունեմ Իսրայելի եւ Ադրբեջանի սադրիչների վրա, ովքեր փորձում են իրավաբանական մեխանիզմներով թույլ չտալ իմ վերադարձը Լեռնային Ղարաբաղ»:
