Tert.am–ը գրում է.
Գերմանիայի բնակչուհի Իվոն Հերմանն իր տան այգում կենգուրու է հայտնաբերել: Ինչպես հայտնում է Газета.Ru-ն` TheLocal.de-ին հղումով, միջադեպը տեղի է ունեցել Բեռլինից հարավ գտնվող Ֆրանկենֆերդ գյուղում:
Տեսնելով կենդանուն մարգագետնում` Հերմանն ու նրա ամուսինը չեն հավատացել իրենց աչքերին: Ոստիկանության աշխատակիցները ևս զարմացած են մնացել: Ոստիկանների «դեպքի վայր» հասնելու պահին կենգուրուն արդեն թաքնվել էր մոտակա եգիպտացորենի դաշտում:
Կարճ ժամանակ անց կենգուրուն կրկին հայտնվել է Հերմանի տեսադաշտում, և գերմանուհին կրկին ոստիկանություն է կանչել: Այս անգամ իրավապահների հետ դեպքի վայր էին ժամանել նաև անասնաբույժներ` քնաբեր ներարկող զենքով: Նրանց հինգ փորձից նոր հաջողվել է քնեցնել կենգուրուին:
Կենդանուն տարել են մոտակայքում գտնվող ագարակ: Տեղի իշխանությունները պատկերացում չունեն, թե որտեղից է կենդանին այդտեղ հայտնվել: