Tert.am-ը գրում է.
Կոռուպցիայի դեմ պայքարող միջազգային Transparency International կազմակերպությունն Ադրբեջանին կոչ է արել անհապաղ ազատ արձակել հայտնի իրավապաշտպաններ Լեյլա Յունուսին և նրա ամուսնուն՝ Արիֆ Յունուսին։
Ինչպես տեղեկացնում է contact.az-ը, հայտարարության մեջ ասված է, որ միջազգային դիտորդները նկատել են, որ Լեյլայի և Արիֆի վիճակը վատացել է այն ժամանակաշրջանում, երբ Բաքվում «քաղաքական բնույթ ունեցող» նրանց դատավարությունն է ընթանում։
Լեյլան շաքարային դիաբետ, երիկամային անբավարարություն և լյարդի լուրջ հիվանդություն ունի. սակայն իշխանությունները թույլ չեն տալիս հոսպիտալացնել նրան և ադեկվատ բուժում ցուցաբերել։ Այս ընթացքում նրա առողջական վիճակը կտրուկ վատացել է։
Նրա ամուսինը հիպերտոնիա ունի։
«Transparency International-ը կարծում է, որ նրանք երկուսն էլ մարդասիրական նպատակներով պետք է ազատ արձակվեն՝ արդար դատավարության բացակայության ֆոնին»,-ասված է հայտարարության մեջ։
Եվրոպայի և Կենտրոնական Ասիայի տարածաշրջանային տնօրեն Անն Կոչը հայտարարել է, որ Ադրբեջանի կառավարությունը պետք է ի ցույց դնի իր հավատարմությունը Մարդու իրավունքների եվրոպական կոնվենցիային և անհապաղ ազատ արձակի Լեյլա և Արիֆ Յունուսներին։