Tert.am-ը գրում է.
Ցանկացած Սահմանադրություն միշտ էլ կարելի է բարելավել: Այս մասին այսօր մամուլի ասուլիսին ասաց «Ընդդեմ իրավական կամայականության» ՀԿ տնօրեն Լարիսա Ալավերդյանը: Նա ներկայացված սահմանադրական բարեփոխումների նախագծի մեջ նկատեց, որ մարդու իրավունքների դրույթը՝ մասնավորապես կյանքի իրավունքի վերաբերյալ դրույթը, շատ կարճ է:
«Ամենաանհասկանալի գլուխը երրորդ գլուխն է՝ սոցիալական քաղաքականությունը, անհասկանալի է տարանջատումը քաղաքական և քաղաքացիական իրավունքների, այնքան անորոշություններ կան»,- ասաց նա և նշեց, որ մարդու իրավունքների մասը գրեթե երկու անգամ ավելացել է:
Նա անընդունելի համարեց այս փոփոխությունների շրջանակում նկատվող շտապողականությունը: Ինչ վերաբերում է խորհրդարանական համակարգի անցմանը, Լարիսա Ալավերդյանն ասաց, որ ինքը դրան կողմ է եղել 90-ական թվականներից սկսած: «Խնդիրը վերարտադրությունը չէ, այլ թե ինչն է վերարտադրվում»,- ասաց նա:
Ըստ նրա՝մեր քաղաքական մշակույթին չի համապատասխանում այս փոփոխությունը:
