Tert.am-ը գրում է.
Ազգային ժողովում լրագրողները հանրապետական պատգամավոր, ԱԺ փոխխոսնակ Հերմինե Նաղդալյանից խնդրեցին գնահատել հոսանքի թանկացման շարժման ողջ գործընթացը:
Նաղդալյանը նշեց, որ այն երևույթը, որ շուրջ տասը օր փակ և պարալիզացված է քաղաքի կարևորագույն փողոցը, ինչը լավագույն իլյուստրացիան է, թե որքանով է ժողովրդավար երկիր Հայաստանը:
«Իմիջիայլոց երկրի նկատմամբ նման մոտեցում կար նաև մեր միջազգային գործընկներից շատ շատերի մոտ, ովքեր հասկանում են, որ ժողովրդավարությունը հենց մարդկանց ազատությունն է՝ հավաքներ և ցույցեր իրականացնելու, և տասը օր շարունակ այս իրավիճակն է Հայաստանում»,-ասաց նա:
Իսկ ինչ վերաբերում է հունիսի 23-ին տեղի ունեցած բռնություններին, նաև լրագրողների նկատմամբ, ապա Նաղդալյանը նշեց, որ ծառայողական քննությունը, որ իրականացվում է հնարավորություն կտա պատասխանել բազմաթիվ հարցերի:
Լրագրողները հետաքրքրվեցին, թե եզրակացություն արե՞լ է ՀՀԿ-ն, երբ կենդանի պատի տեսքով նախաձեռնության ժամանակ ՀՀԿ-ականներ կային և որոնց նկատմամբ ժողովրդի վերաբերմունքը ոչ միանշանակ էր: Նաև հարցրեցին, թե ինչպե՞ս է գնահատում ոստիկանապետ Վլադիմիր Գասպարյանի վարքը, ով նույնիսկ պատգամավորների վրա էր հոխորտում:
Նաղդալյանը նշեց, թե դժվարանում է խոսել ոստիկանապետի վարքից, քանի որ տեղյակ չէ և հասկանալի պատճառներով երկրում չէր՝ մասնակցում էր ԵԽԽՎ ամառային նստաշրջանին:
Ինչ վերաբերում է ՀՀԿ-ականների այցին, ապա նա դա համարեց համարձակ քայլ:
«Քաղաքական գործիչը ժողովրդի կողքին պետք է լինի և հասկանա, թե ինչ են մտածում մասսաները, և պարոն Աշոտյանի քայլը և մյուս մեր գործընկերոջ քայլը դրանով եմ բացատրում և համարում եմ, որ սա մոտեցում էր, որը իրավունք ունի տեղի ունենալ»,-ասաց նա:
Հարցին, թե Հերմինե Նաղդալյանը պատրա՞ստ է կրկնել «այդ սխրանքը», նա պատասխանեց, որ եթե պատրաստվի դա անել, լրագրողները տեղյակ կլինեն: