Սոցիալական ցանցերում վերջերս մի նոր միտում է նկատվում, որը մտահոգության տեղիք է տալիս։ Սառցե դույլի մարտահրավերից հազիվ էինք պրծել, հիմա էլ Քայլի Ջեների մարտահրավերն է սկսվել։ Մարդիկ իրար մարտահրավեր են ուղարկում՝ պահանջելով ներշնչել որևէ շշի կամ բաժակի օդն այնքան ուժգնորեն ու այնքան ժամանակ, մինչև որ իրենց շրթունքներն անճոռնի կերպով ուռչեն։ Սրանից ավելի մեծ հիմարություն դժվար էր մտածել։ Փորձեք կռահել, թե ովքեր են այս հիմարությաան հեղինակներն ու հիմնական զոհերը։ Դե իհարկե, դեռահասները։
Գործում է հետևյալ մեխանիզմը. Քայլի Ջեների մարտահրավերի մասնակիցները իրենց բերանը դնում են բաժակի, բյուրեղապակյա տարայի, շշի կամ որևէ այլ նեղ անոթի վրա ու ներս քաշում օդն այնքան ժամանակ, մինչև որ առաջացած վակուումի պատճառով նրանց շուրթերն ուռչում են։ Ամենատարօրինակն այն է, որ այս մարտահրավերն ընդունում ու ապա ուղարկում են իրենց ընկերներին ոչ միայն աղջիները, այլև տղաները։ Նրանք հետագայում այս անհեթեթ էքսպերիմենտի արդյունքներով կիսվում են տարբեր սոցցանցերում՝ «Twitter»-ում, «Instagram»-ում և այլն՝ առանց գիտակցելու, որ այս էքսպերիմենտի հետևանքով կարող են լուրջ առողջական խնդիրների առջև կանգնել։
Մարտահրավերն ընդունած դեռահասներից շատերի բերանը պատվում է կապտուկներով, ի հայտ են գալիս մաշկային խնդիրներ, դե գեղագիտական տեսքի մասին էլ չենք խոսում։ Բազում պատանիներ միայն հետագայում են հասկանում, թե ինչպիսի մեծ հիմարություն են գործել՝ ընդունելով իրենց ուղարկված մարտահրավերը ու լուսանկարին կից գրառումներ են կատարում այն մասին, թե որքան դժգոհ են իրենք արդյունքից, որքան են ցավում իրենց շրթունքները, ու որքան անճոռնի տեսք են իրենք ստացել։
Քանի որ առաջացած վակուումի հետևանքով արյան շրջանառությունը բերանի հատվածում վատանում է, շուրթերը կարող են մանուշակագույն երանգ ստանալ։ Այս արտառոց էքսպերիմենտի ազդեցությունը տևում է ժամեր, իսկ որոշ դեպքերում՝ անգամ օրեր։
Անցյալ ամիս երկու իսլանդացի քույրեր՝ Յրջա Աս Բալդվինսդոթիրը ու Բիրգիթա Ասը, մասնակցեցին համացանցը հեղեղած այս չխմազ էքսպերիմենտին՝ բաժակի կամ շշի փոխարեն օգտագործելով մազի լաքի կափարիչ։ Արդյունքում նրանց շուրթերն այնքան այտուցվեցին ու կապտեցին, որ նրանք, մեղմ ասած, անմխիթար տեսք ստացան և իհարկե զղջացին մարտահրավերն ընդունելու համար։
Նրանք շտապեցին իրրենց անհաջող օրինակով կիսվել սոցցանցում՝ կոչ անելով չհետևել իրենց ու մյուս արկածախնդիր դեռահասների օրինակին։ Յրջան նշել է, որ իրենք ընդամենը ցանկանում էին ցույց տալ, թե որքան տգեղ են ուռած շրթունքները, սակայն շոկի մեջ էին, երբ նկատեցին, որ բազում մարդիկ հետևում էին իրենց օրինակին։ Մյուս քույրն էլ իր ֆեյսբուքյան էջում գրել է.
Ես պարզապես ցանկանում էի փորձել ու տեսնել, թե արդյունքում շուրթերս ինչպիսի տեսք կստանան։ Ես նախկինում երբեք նման բան չէի արել ու ապագայում էլ հաստատ չեմ անի։ Դա շատ-շատ ցավոտ էր։ Իմ շուրթերը կապտել էին։
Ինչ վերաբերում է Քայլիին, 17-ամյա ռիելիթի աստղը վերջերս հերքել է շշուկներն այն մասին, որ ինքը շրթունքների պլաստիկ վիրահատության է դիմել։ Նա մասնավորապես ասել է.
Ես երբեք դանակի տակ չեմ եղել։ Դադարե՛ք խոսել իմ շրթունքների մասին։ Ես պլաստիկ վիրահատության չեմ դիմել։ Մարդիկ հղում են կատարում այն լուսանկարներիս, որոնցում ես 12 տարեկան եմ, ու ասում են. «Քայլին այնքան տարբեր է հիմա», բայց ախր ես ինչպե՞ս կարող եմ 18 տարեկանում նույն տեսքն ունենալ, ինչ 12 տարեկանում ունեի։
Խեղճ Քայլի, պատկերացնո՞ւմ եք, թե այս մարտահրավերի տարածումից ի վեր քանի՜-քանի՜ ծնողներ ու դեռահասներ են հիշել նրան իրենց լուտանքներում։ Այստեղ են ասել, անմեղ մեղավոր։