Եթե հավատանք Հայպետհիդրոմետին (բայց արժի՞ որ), ապրիլն անձրևոտ է լինելու, սակայն սա դեռ տխրԵլու առիթ չէ, քանի որ վերջերս ստեղծվել է սմարթ անձրևանոց: «Kisha» կոչվող այս անձրևանոցը Ձեր լավագույն ընկերը կդառնա անձրևային օրերին: Այս անձրևանոցի բռնակին ներագուցված է Bluetooth-ի չիպ ու փոքրիկ լապտեր: Լապտերը կարող է միշտ միացված մնալ՝ հնարավորություն տալով Ձեզ հեշտությամբ գտնել Ձեր անձրևանոցը վառ լույսի օգնությամբ: Ինչ վերաբերում է չիպին, ապա այն հատուկ հավելվածի օգնությամբ միացված է սմարթֆոնին, ինչի շորհիվ Դուք կարող եք պարզել առաջիկա 5 օրվա եղանակը: Բացի այդ, հավելվածին միացած լինելու դեպքում անձրևանոցը հաղորդագրություն է ուղարկում հեռախոսին, եթե Դուք այն մոռանում եք ինչ-որ տեղում: Եթե այն հանկարծ կորչի, Դուք կարող եք հավելվածի քարտեզի միջոցով ճշգրտորեն տեղորոշել, թե որտեղ է գտնվում Ձեր անձրևանոցը: Այս սմարթ անձրևանոցի հեղինակը խորվաթ Գորան Քանդրլիքն է: Հարցազրույցներից մեկի ընթացքում նա պատմել է, թե ինչպես է հղացել սմարթ անձրևանոցի ստեղծման գաղափարը:
Ամեն ինչ սկսվեց այն ժամանակ, երբ մեզ մոտ երկու շաբաթ շարունակ անձրև էր տեղում: Ընկերս ինձ հաղորդագրություն ուղարկեց հետևյալ բովանդակությամբ. «Մենք պետք է անձրևանոցների արտադրությամբ զբաղվող ընկերություն հիմնենք»: Ի պատասխան ես գրեցի. «Մենք պետք է նաև չիպ դնենք անձրևանոցների վրա, որպեսզի անհնար լինի դրանք կորցնել»: Այսպես մենք հիմնեցինք բարձրորակ անձրևանոցներ արտադրող գործարան: Մենք ցանկանում էինք ստեղծել լավագույն անձրևանոցը: Մենք ցանկանում էինք այնպիսի արտադրանք ստեղծել, որը երկար կծառայեր գնորդներին:
Ընկերների համագործակցության արդյունքում ստեղծվեց «Kisha»-ն, որը դիմանում է մինչև 193կմ/ժ ուժգնությամբ քամուն: Հատուկ մեխանիզմի շնորհիվ ուժեք քամու ժամանակ անձրևանոցի մետաղական մասը ճկվում է, ապա ինքն իրեն շտկվում, մինչդեռ անձրևանոցների մեծ մասը ճկվելուց հետո կոտրվում են: Լապտերի մարտկոցը 3-6 ամիս է բավականացնում, իսկ նստելուց հետո կարող է հեշտությամբ փոխարինվել այլ մարտկոցով: Այս սմարթ անձրևանոցը 3 տարվա երաշխիք ունի: Այնպես որ անձրևոտ օրերն այլևս չեն կարող վախեցնել Ձեզ, եթե իհարկե պատրաստ եք 72 դոլար վճարել այս գերժամանակակից աքսեսուարի դիմաց:
Կայքում տեղ գտած մտքերն ու տեսակետները հեղինակի սեփականությունն են և կարող են չհամընկնել BlogNews.am-ի խմբագրության տեսակետների հետ: