Այս չիպսի փաթեթի վրա գրված էր, որ այն պարունակում է 100 տոկոսանոց բրիտանական կարտոֆիլ։ Երբ Ռիչարդ Բութմենը բացեց չիպսի տուփը, անմիջապես պարզ դարձավ, որ այս գրառումը 100 տոկոսանոց ճշմարտություն էր։ Բանն այն է, որ փաթեթի մեջ ոչ թե բրիտանական բարձրորակ կարտոֆիլից պատրաստված չիպս էր, այլ չիպսի հիմնական բաղադրատարրը՝ հում կարտոֆիլը։
Բութմենն առանձանապես չէր նեղվել, որ չիպս ուտելու իր փափագն այդպես էլ անկատար մնաց։ Նա ու նրա ընկերները դժվար թե այդքան լիաթոք ծիծաղեին, եթե տուփի մեջ չիպս լիներ։ Նա լուսանկարեց մեկ կարտոֆիլով լի փաթեթը ու լուսանկարը տեղադրեց սոցցանցում։ Լուսանկարն այնքան մեծ տարածում գտավ ինտերնետում, որ բրիտանական կայքերից մեկը՝ BT.com-ը, որոշեց հարցազրույց անցկացնել Բութմենի հետ։
Հարցազրույցի ընթացքում նա նշել է.
Ես վերցրի չիփսի փաթեթն ու չմտածեցի, թե այնտեղ որևէ արտառոց բան կարող է լինել։ Ես շտապում էի ու առանձնապես շատ ժամանակ չհատկացրի չիպս ընտրելուն։ Երբ ես գրասենյակում բացեցի չիփսի փաթեթը, ու մենք տեսանք դրա պարունակությունը, մենք պարզապես չէինք կարողանում հավատալ մեր աչքերին։ Աշխատավայրում բոլորը մի կուշտ ծիծաղեցին։ Հավանաբար ես նորից կգնեմ այս չիպսերից։ Պարզապես մյուս անգամ մի լավ կշոշափեմ փաթեթը։
Սոցցանցում բարձրացած աղմուկից հետո «Aldi» ընկերությունը, որը հանդիասնում է այս չիպսի արտադրողը, հրապարակայնորեն ներողություն է խնդրել պրն. Բութմենից պատճառված վնասի համար։ Ընկերության աշխատակիցները նաև առաջարկել են փոխհատուցել ծախսը, եթե Բութմենը պահպանել է դրամարկղային կտրոնը։
Բութմենի՝ չիպսի մասին արված հրապարակմամբ կիսվել են Թայվանի, Ռուսաստանի ու անգամ Հնդկաստանի բնակիչները։ Այս վայրերում հազիվ թե որևէ մեկը լսած լիներ չիպսերի արտադրությամբ զբաղվող այս ընկերության մասին, այնպես որ Բութմենի հրապարակումից հետո ընկերությունն ինչ-որ իմաստով աշխարհահռչակ դարձավ, միայն թե ոչ դրական իմաստով։