Tert.am-ը գրում է.
Տնտեսական մրցակցության պաշտպանության պետական հանձնաժողովի 2015թ-ի ծրագրի հաշվետվությանը «Բարգավաճ Հայաստան» խմբակցության ղեկավար Նաիրա Զոհրաբյանը ՏՄՊՊՀ նախագահ Արտակ Շաբոյանին հարցրեց, թե վերահսկվո՞ւմ է արդյոք առաջին անհրաժեշտության ապրանքների գնագոյացումը:
Նաիրա Զոհրաբյանը նաև փաստեց, որ տնտեսվարողներն անտեսում են օրենքի պահանջները, օրինակ այն, որ գնորդը իրավունք ունի որոշակի ժամկետում հետ վերադարձնել ապրանքը:
Արտակ Շաբոյանը նշեց, որ գնագոյացման խնդիրը գտնվում է հանձնաժողովի տեսադաշտում, եթե այդտեղ կա մենաշնորհի հարց:
«Մնացած դեպքերում ազատ շուկայական պայմաններում, գիտեք, որ գներն առաջանում են առաջարկի և պահանջարկի պայմաններում, և տարբեր գործոններ են ազդում գնաճի վրա»,-ասաց նա:
Շաբոյանը նշեց, թե օրինակ՝ փոխարժեքի տատանումների պայմաններում գնագոյացումը այդքան մեծ չի եղել, որքան որ սպասելի էր:
Ինչ վերաբերում է տնտեսվարողների կողմից օրենքի անտեսմանը, ապա ՏՄՊՊՀ նախագահը խոստացավ հետևողական լինել, ուսումնասիրել, բացահայտել և ներկայացնել արդյունքները:
