Tert.am-ը գրում է.
Թուրքիայի նախագահ Ռեջեփ Թայիփ Էրդողանի` ՀՀ սփյուռքին ուղղված կոչը խուճապի մատնված մարդու ելույթ է: Այս մասին Tert.am-ի հետ զրույցում ասաց Հայ Յեղափոխական Դաշնակցության Բյուրոյի Հայ դատի և քաղաքական հարցերի գրասենյակի տնօրեն Կիրո Մանոյանը:
«Որքան մոտենում է Հայոց ցեղասպանության տարելիցը, այնքան շատանում է այդ խուճապը, և այդ մարդը մի բան պիտի ասի նախ՝ իր հասարակությանը, ապա՝ աշխարհին »,- ասաց դաշնակցականը:
Վերջինիս խոսքով` թուրքական արխիվները «մաքրագործված են» տարիներ ընթացքում:
Հիշեցնենք, որ Ռեջեփ Թայիփ Էրդողանն Օսմանյան արխիվի շենքում կազմակերպված «Համաշխարհային պատերազմի փաստաթղթերը՝ 100-րդ տարում» սիմպոզիումի ու ցուցահանդեսի բացմանը`դիմելով հայկական սփյուռքին ասել էր. «Սփյո՛ւռք, Հայաստանի՛ ղեկավարություն, մեր փաստերն այստեղ են: Դու էլ, ինչ փաստեր ունես, հանի՛ր դրանք: Երկրներով շրջելով ու որոշ տեղերում փող կերցնելով արշավներ կազմակերպելով արդյունքի չեք հասնելու»:
Էրդողանը հայտարարել է, թե ինքը միշտ կոչ է արել, այժմ էլ է կոչ անում, որ գան, ուսումնասիրեն թուրքական արխիվները:
«Կուսակցական արխիվներ ընդհանրապես չկան, և իրենց բոլոր արխիվները փակ են ու հիմա, երբ ասում է կբացենք` դրանք վարչապետարանին կից արխիվներն են, բայց ռազմական արխիվները փակ են: Բայց եթե բացեն էլ, մաքրագործված կլինեն»,- ասաց Կիրո Մանոյանը:
Նա նկատեց, որ փակ են նաև թուրքական կադաստրի արխիվները, որոնց շնորհիվ կարող էին երևալ Ցեղասպանությունից առաջ հայերի գույքի ու ինչքի սեփականությունը:
Հիշեցնենք, որ Tert.am-ի հետ զրույցում ՀՀ ԳԱԱ արևելագիտության ինստիտուտի տնօրեն Ռուբեն Սաֆրաստյանը հայտնել էր, ո ր թուրքական կուսակցական արխիվների առկայությունը շատ կարևոր կարող էին,քանի որ Հայոց ցեղասպանության իրականացման հրամանները տրվել են հիմնականում երիտթուրքերի կուսակցական խողովակներով:
Նա նաև հավելել էր, ո ր թուրքական արխիվներում տարիներ շարունակ հատուկ ծառայություններ են աշխատել: