Հյուսիսատլանտյան դաշինքը պահանջում է Ռուսաստանից չճանաչել Աբխազիայի և Հարավային Օսիայի անկախությունը: Այս մասին այսօր հայտարարվել է ՆԱՏՕ-Վրաստան խմբի համատեղ ամփոփիչ նիստում:
«ՆԱՏՕ-ի անդամ պետությունների ղեկավարները հետևողականորեն շարունակելու են չճանաչել Աբխազիայի և Հարավային Օսիայի անկախությունը և կոչ են անում Ռուսաստանին ևս զերծ մնալ նման քայլից»,-ասված է հայտարարության մեջ: Միաժամանակ փաստաթղթում ևս մեկ անգամ հավաստիացվում է, որ ՆԱՏՕ-ն լիովին աջակցում է Վրաստանի անկախությանն ու տարածքային ամբողջականությանը:
Հիշեցնենք, որ այսօր Բրյուսելում տեղի է ունեցել Վրաստան-ՆԱՏՕ խմբի հերթական հանդիպումը: Ավելի վաղ հայտնի էր դարձել, որ Հյուսիսատլանտյան դաշինքն ու պաշտոնական Թբիլիսին պայմանավորվածություն են ձեռք բերել Վրաստանի տարածքում զորավարժություններ անցկացնելու վերաբերյալ:
