Համակարգչային տեխնոլոգիաների աշխարհում անընդհատ ի հայտ են գալիս նոր և տպավորիչ մշակումներ, որոնք ապշեցնում են ավելի կատարյալ և գրեթե ֆանտաստիկ ձևափոխմամբ, իսկ անհատական համակարգիչներին ուղղակի վիճակված է հանդուրժել վիդեոփոփոխությունների այդ մեծ քանակությունը:
Հետևելով այն կանոնին, որ «տեխնիկան պետք է լինի ոչ միայն ֆունկցիոնալ, այլև գեղեցիկ»՝ ոճաբանները ստեղծում են ֆուտուրիստական հայեցակարգային նախագծեր, որոնք փոխում են մեր պատկերացումներն այն մասին, թե ինչ տեսք պետք է ունենան նոր սերնդի համակարգիչները:
Համակարգչային հաջորդ նորույթները դեռևս զանգվածային արտադրություն չունեն, սակայն ո՞վ գիտե, միգուցե արդեն մեկ տարի անց միլիոնավոր օգտագործողներ ամբողջ աշխարհում կցանկանան ձեռք բերել դրանք ցանկացած գնով:
1. Համակարգիչ` առանց ստեղնաշարի և էկրանի
Դիզայներ-նախագծող Յակուբ Զախորն աշխարհին առաջարկեց շարժական համակարգչի (laptop) ֆուտուրիստական հետաքրքրաշարժ հայեցակարգ, որն օգտագործողներին թույլ կտա կառավարել սարքավորումն ամենուր, որտեղ կա հարթ մակերևույթ: Վերջինս կարող է «էկրանի» դեր կատարել: Սեղանի համակարգիչը բաղկացած կլինի միայն մկնիկի մեծության համակարգային բլոկից: Բացի այդ, այն համալրված է տեսախցիկներով և փոքր չափի պրոյեկտորով, որն ընդունակ է արտացոլել բարձր որակի հոլոգրաֆիկ նկարը ցանկացած հարմար, այդ թվում` ապակե մակերևույթի վրա:
2. RollTop . ծալովի նոութբուք
RollTop-ը 17 դյույմանոց էկրանով ճկուն նոութբուք է, որը կարելի է ծալել, ինչպես թղթի գլանակ`ստեղծելով առավելագույն հարմարություն նրա տեղափոխման համար: Նոութբուքը համալրված է OLED ծալովի էկրանով, ինչը multi-touch ֆունկցիայով սենսորային կառավարման հնարավորություն է տալիս` դարձնելով նրան թեթև և ֆունկցիոնալ, ինչպես iPhone-ը: Ցանկության դեպքում սարքը կարող է փոխակերպվել 13 դյույմանոց պլանշետային համակարգչի: Սենսորային համակարգից բացի՝ այն ունի նաև կոճակներից բաղկացած ստեղնաշար, ինչը շատ է պետք գալիս տեքստ հավաքելու գործում: Ծալված վիճակում այս կոմպակտ նոութբուքը հետշությամբ կարելի է կրել որպես պայուսակ`անցկացնելով գոտին ուսի վրայով:
3. HP LiM
Hewlett-Packard-ի կողմից թողարկված LiM (LessisMore – նշ. Է «քիչը նշանակում է շատ») անվամբ հաջորդ սերնդի համակարգչի հայեցակարգն իրենից ներկայացնում է դատարկ ֆոտոալբոմ հիշեցնող փոքր համակարգային բլոկ և 19 դյույմանոց բացարձակ թափանցիկ սենսորային էկրան, որն ունի ապակու կտորի տեսք: Այս բոլորին համալրում է մկնիկի դեր կատարող սենսորային վահանակը և բարակ, առանց լարի ստեղնաշարը:
4. Laptop B-membrane
Այս ֆանտաստիկ համակարգիչը մշակվել է կորեացի դիզայներ Վոն-Սեոկ Լիի կողմից: Մեմբրանային ստեղնաշարը սարքի հիմքում հայտնվում է միայն այն ժամանակ, երբ դա անհրաժեշտ է: Նրա օգնությամբ կարելի է տեքստ մուտքագրել: Այս գործիքի համար էկրան նախատեսված չի: Նրա փոխարեն պտտվող պրոյեկտորի օգնությամբ կարելի է պրոյեկտել նկարը ցանկացած մակերևույթի վրա:
5. Horizon ճկուն շարժական էկրան
Այս ստացիոնար համակարգիչը համալրված է OLED ճկուն էկրանով: Օգտագործողներն այլևս ստիպված չեն լինի անհանգստանալ էկրանի չափերի համար, քանի որ այս հայեցակարգի էկրանը հնարավոր կլինի ձգել անհրաժեշտ մեծության:
6. Laptop Prime Gaming
Այս նորույթը, թերևս, ցանկացած գեյմերի երազանքը կարող է դառնալ: Դիզայներ Կայլ Չերին առաջարկեց OLED ծալվող էկրանով խաղային նոութբուքի յուրատեսակ հայեցակարգ: Հեղինակը, որպես լրացում 10 դյույմանոց OLED էկրանի (կողմերի հարաբերությունը`16:10), առաջարկում է օգտագործել նաև երկու Aux OLED վահանակ: Ծալված վիճակում Prime-ը 13 դյույմանոց սովորական նոութբուքի տեսք ունի: Բացված վիճակում կստանանք 26 դյույմ (կողմերի հարաբերությունը`32:10) անկյունագծով լայն ֆորմատի գերազանց էկրան: Ենթադրվում է, որ նոութբուքի կորպուսն ամբողջությամբ պատրաստված կլինի ալյումինից, իսկ բուն համակարգիչը համալրված կլինի սառեցման հզոր համակարգով:
7. Napkin PC հայեցակարգ
Դիզայներ Էյվերի Հոլմենը ստեղծել է համակարգչային հայեցակարգ, որը կդառնա բավականին օգտակար գործիք կոնֆերենց սրահներում: Նրա դիզայնը հիշեցնում է անձեռոցիկի տուփ, որի մեջ տեղադրված են մեկ ցանցի մեջ միավորված սենսորային մի քանի էկրան: Թվային գրիչն օգտագործողներին հնարավորություն կտա նկարել անմիջապես սենսորային էկրանի վրա:
8. Sony Nextep ձեռքի համակարգիչ
Sony Nextep-ը ֆուտուրիստական գործիք է, որը կրում են ձեռքի դաստակին որպես թևնոց: Հայեցակարգն ունի OLED ճկուն սենսորային էկրան, հոլոգրաֆիկ պրոյեկտոր, շարժական ստեղնաշարային վահանակ և սոցիալական ցանցեր մուտքի հնարավորություն: Մշակողները ջանք չեն խնայում, որպեսզի ձեռքի մինի-համակարգիչը հասանելի լինի գնորդներին արդեն 2020թ.-ին: Դիզայներ Հիրոմի Կիրիկիի այս մշակումը դարձավ ամենասպասված նորույթը:
9. KOOB + Համակարգչային մոդուլային համակարգ
Համակարգչային այս ֆուտուրիստական մոդուլային համակարգը բաղկացած է շատ բարակ, թեթև շարժական հիմնական մոդուլից, որն ունի էկրան, հիմնական այլ բաղադրիչներ և շարժական կառավարման մոդուլ: Բոլոր մոդուլները կատարում են տարբեր գործառույթներ` կախված նրանից, թե ինչ է անհրաժեշտ օգտագործողին: Համակարգի մյուս բաղկացուցիչը լարն է, որը կարելի է միացնել գլխավոր մոդուլին` օգտագործելով մույս կողմում տեղադրված փոխարինվող տարբեր կրիչները:
10. InOne համակարգչի հայեցակարգ
InOne-ը կամ «ամեն ինչ մեկում» համակարգիչը ենթադրում է 22 դյույմանոց էկրանի, ստեղնաշարի, touchpad-ի, դինամիկների և թվային պլանշետի առկայություն: Բոլոր այդ բաղադրիչները միավորված են մեկ կորպուսի մեջ և կապված են իրար հետ անլար ցանցով: Պլանշետն արտացոլում է այն ամենը, ինչ դուք կգրեք կամ կնկարեք: Այդ իսկ պատճառով, ոչ մի անհրաժեշտություն չի լինի աչքերն էկրանի վրա բարձրացնելու:
11. Sapphire All-In-One PC
Բրազիլացի դիզայներ Ռաֆայել Բերլոֆի կողմից մինիմալիստական ոճով ստեղծված համակարգչային այս արվեստի գործը խոստանում է դառնալ յուրօրինակ հայտնություն համակարգչային տեխնոլոգիաների ոլորտում: Հայեցակարգի մեջ մտնում են անլար բաղադրիչներ, որոնք չեն պահանջում աշխատանքային որևիցե կայան: Բացի այդ, ստեղնաշարի մեջ ներդրված USB touchpad-ի շնորհիվ համակարգչային մկնիկի անհրաժեշտություն այլևս չի լինի:
