Դու արժանի ես լինել այնպիսի մեկի հետ, ով քեզ կստիպի ժտալ, մեկի, ով քեզ չի թերագնահատի ու ցավ չի պատճառի։
I Մենք կհիշենք, որ յուրաքանչյուր մարդ ու յուրաքանչյուր փոխհարաբերություն տարբեր է: Մարդիկ չեն սիրահարվում նմանություններին, այլ տարբերություններին։ Եղիր քո կատարյալ եսը։ Մենք կատարյալ չենք բոլորի համար, մենք կատարյալ ենք միայն մի քանի հոգու համար, ովքեր ժամանակ են ծախսում մեզ իմանալու ու սիրելու համար այնպիսին, ինչպիսին կանք։ Եվ հենց այս մի քանի հոգու համար մեր անկատարություններով կատարյալ անհատականությունը հենց այն է, ինչ նրանք սիրում են մեր մեջ։ Մի համեմատիր քո հարաբերությունները մեկ ուրիշի հարաբերությունների հետ՝ ոչ ծնողներիդ, ոչ ընկերներիդ, ոչ գործընկերներիդ կամ էլ պատահական այլ մարդկանց հայրաբերություների հետ, ում մոտ ամեն ինչ կատարյալ է թվում։ Յուրաքանչյուր զույգ իր սիրո կանոններն ունի, սիրո մեջ իր համաձայնություններն ու սովորությունները։ Կենտրոնացիր միայն ձեր երկուսի վրա ու աշխատիր ձեր փոխհարաբերությունները հնարավորինս լավացնելու վրա։
II Մենք կլսենք միմյանց ուշադիր՝ առանց միմյանց քննադատելու։ Չափազանց հեշտ է նայել ինչ-որ մեկին ու նրա մասին որոշակի կարծիք կազմել։ Այն, ինչ տվյալ մարդը ցույց է տալիս հասարակությանը, ներսում թաքնված այսբերգի միայն մի փոքրիկ մասնիկն է, որը դու տեսնում ես։ Ու շատ հաճախ այն ծածկված է ամեն տեսակ ճաքերով ու սպիերով, որոնք ձգվում են մինչև հոգու խորքը։
Երբեք մի՛ դատիր։ Սովորիր հարգել ու ճանաչել նրա զգացմունքները։ Ուշադրություն դարձրու նրան։ Ներկա եղիր։ Միշտ չէ, որ մենք խորհրդի կարիք ունենք, երբեմն մենք պարզապես կարիք ունենք, որ մեր ձեռքը բռնեն, լսեն մեզ ու սրտանց հասկանան։ Երբեմն պետք է խոսել, երբեմն էլ լռել։ Իրական իմաստությունն այն է, երբ գիտես դրանց տարբերությունը։ Եվ այս տարբերությունը կարող է կամ կառուցել, կամ էլ քանդել մեր հարաբերությունները։
III Մենք կասենք այն, ինչ նկատի ունենք ու նկատի կունենանք այն, ինչ կասենք։ Կիսվիր այն ամենով, ինչ տեղի է ունենում քո մտքում ու սրտում։ Կիսվիր քո ամենախորը մտքերով, կարիքներով, ցանկություններով, հույսերով ու երազանքներով։ Բաց հաղորդակցությունն ու ազնվությունը չափազանց կարևոր է առողջ հաարբերությունների համար։ Քո կյանքում կարևոր տեղ զբաղեցնող մարդկանց տուր այն ինֆորմացիան, որի կարիքը նրանք ունեն, և ոչ թե սպասիր նրանցից, որ իմանան այն, ինչ նրանք չեն կարող իմանալ, մինչև որ նրանց հետ չխոսես։ Մի փորձիր կարդալ մյուսի մտքերը ու մի ստիպիր մյուսներին՝ հատկապես քո երկրորդ կեսին, կարդալ մտքերդ, այլ հաղորդակցվիր ու կիսվիր այն ամենով, ինչ կա մտքիդ ու սրտիդ մեջ։
IV Մենք կաջակցենք միմյանց լավ ու վատ պահերին։ Միմյանց կողքին եղեք լավ ու վատ պահերին։ Պատրաստակամ եղեք լսել, գրկել ու էմոցիոնալ առումով սատարել յուրաքանչյուր իրավիճակում։ Վստահեք, որ կարողանաք միմյանց վրա հույս դնել յուրաքանչյուր իրավիճակում, ոչ միայն երբ հարմար է, այլև այն ժամանակ, երբ միմյանց կարիքն առավել շատ կունենաք։
V Մենք հավատարիմ կլինենք։ Իրական սերն ու իրական ընկերությունն անբաժան լինելու մեջ չէ։ Այս հարաբերությունները երկու մարդկանց՝ միմյանց հավատարիմ լինելն է նույնիսկ երբ նրանք միմյանցից հեռու են գտնվում։ Երբ խոսքը վերաբերում է փոխհարաբերություներին, միմյանց հավատարիմ լինելը ընտրություն չէ, այլ առաջնահերթություն։ Հավատարմությունն ամեն ինչ է։
VI Մենք կապրենք՝ հավատարիմ լինելով ճշմարտությանը։ Ներքին խաղաղությունը գալիս է այն ժամանակ, երբ հանգիստ ես՝ իմանալով, որ ոչ ոքի չես օգտագործել հասնելու համար այնտեղ, որ այժմ կաս։ Ապրիր այնպիսի կյանքով, որ երբ խոսեն արդարությունից ու վստահությունից, քո մասին մտածեն։
VII Մենք լավ ժամանակ կանցկացնենք միմյանց հետ։ Ժամանակ ունեցեք միմյանց համար։ Մեր զբաղված օրակարգով՝ հաճախ մոռանում ենք հանգստանալ ու վայելել այն հրաշալի ըկերակցությունը, որ ունենք։ Մարդկային փոխհարաբերություններում հեռավորությունը մղոններով չէ, որ չափվում է, այլ ջերմությամբ։ Երկու մարդիկ կարող են իրար կողք նստած լինել, սակայն մղոններով հեռու։ Այնպես որ, մի արհամարհիր մեկին, ով մտահոգվում է քեզ համար, որովհետև անտարբերությունն ավելի շատ ցավ է պատճառում, քան բարկության բառերը։ Առնվազն շաբաթը մեկ անգամ առանձնահատուկ ժամանակ հատկացրեք միայն ձեր երկուսին։ Ինչ-որ զվարճալի մի բան արեք։ Ժամանակ անցկացրեք միմյանց հետ զրուցելով, միմյանց ծիծաղեցնելով կամ ինչ-որ տեղ հանդիպելով ու զբոսնելով։
VIII Մենք կգնահատենք միմյանց ու կօգնենք միմյանց աճել ու զարգանալ։ Երկրորդ կեսիդ գնահատելն առանձնակի որակ է փոխանցում հարաբերություններին։ Ուրախացիր նրա համար, երբ նա անձնական առաջընթաց է ունենում։ Ուրախացիր նրա հաղթանակների համար։ Տոնիր նրա ձեռքբերումները, ոգևորիր՝ քայլել դեպի իր նպատակներն ու ցանկությունները։ Խրախուսիր նրան լինել իր լավագույն անհատականությունը։ Ու շնորհակալ եղիր նրա օրհնությունների համար։
IX Մենք խաղաղ ճանապարհով կլուծենք անհամաձայնությունները։ Քիչ բան կա, որ արժանի է վեճի պատճառ դառնալ։ Եթե դու կարող ես խուսափել դրանից, մի վիճիր։ Հետ կանգնիր նրա հետ վեճի բռնվելուց։ Երբ զգում ես, որ բարկությունը խեղդում է կոկորդդ ու ուզում ես բղավել, փակ պահիր շուրթերդ ու պարզապես հեռացիր։ Թույլ մի տուր, որ բարկությունդ իր ձեռքն առնի քեզ։ Պարտադիր չէ, որ դու ճիշտ լինես, և/կամ հաղթես տարաձայնության մեջ։ Դա այնքան էլ կարևոր չէ։ Ինքդ քեզ որոշակի ժամաանկ տուր հանգստանալու համար, այնուհետև հանգիստ քննարկիր իրավիճակը նրա հետ։
X Մենք կսիրենք ու կհարգենք նաև ինքներս մեզ որպես անհատներ։ Մեր առաջին ու վերջին սերն ինքներս մեր հանդեպ է։ Քո երջանկության ու արժեքի համար հույս մի դիր ո՛չ քո երկրորդ կեսի, և ո՛չ էլ աշխարհում որևէ այլ մարդու վրա։ Միայն դու ես պատասխանատու դրա համար։ Եթե դու չես կարող սիրել ու հարգել ինքդ քեզ, ուրիշ ոչ ոք դա չի կարող անել։ Ամբողջությամբ ընդունիր քեզ այնպիսին, ինչպիսին կաս՝ լավ ու վատ կողմերով։ Եվ քո կյանքում արա այն փոփոխությունները, որոնք հասկանում ես, որ անհրաժեշտ են՝ ոչ թե նրա համար, որ ինչ-որ մեկը ցանկանում է, որ դու փոխվես, այլ նրա համար, որ դու գիտակցում ես, որ դա ճիշտ է քեզ համար։
