Դավիթը պարտադրում է ԵԱՀԿ-ին կատարել իր առաքելություններից ու Հայաստանի հանդեպ պարտավորություններից մեկը Ուշացումով. երեկոյան իմացա, որ իմ հրաշալի ընկեր Դավիթ Սանասարյանը շատ հստակ թիրախով ու պահանջներով բողոքի ակցիա է սկսել ԵԱՀԿ երևանյան գրասենյակի դիմաց: Ես միշտ տատանվելու եմ բողոքի այդ ծայրահեղ ձևն ընտրելու հարցում, բայց որ Դավիթը շատ տեղին ու շատ կոնկրետ խնդիր է ուզում լուծել, դրանում մեկ գրամ կասկած չունեմ: Վստահ եմ, որ Դավիթի, նրան սատարող, զորակցող բոլոր մարդկանց ջանքերը կարևոր դեր են խաղալու մեր նահատակ տղաների աճյունները բերելու գործում: Համաձայն չեմ բոլոր նրանց հետ, ովքեր գտնում են, թե ԵԱՀԿ շատ մեծ անելիք չունի: Ցավալիորեն, մեզանից շատերը շատ քիչ բան գիտեն ԵԱՀԿ մեխանիզմների մասին: Անգամ պետական այրերն ամբողջ ծավալով չգիտեն դա, որովհետև երբեք չօգտագործեցին վեճերի խաղաղ լուծման, դեպքերի հետաքննության ու ԵԱՀԿ այլ մեխանիզմները: Դավիթը պարտադրում է ԵԱՀԿ-ին կատարել իր առաքելություններից ու Հայաստանի հանդեպ պարտավորություններից մեկը, այն էլ նման բարդ իրավիճակում ու խնդրով: Ի վերջո, միջազգային կառույցներին Հայաստանի անդամակցությունը ենթադրում է ոչ միայն մեր երկրի պարտավորություններ նրանց առաջ, այլ նաև հակառակը՝ այդ կառույցների պարտավորություն մեր երկրի ու ժողովրդի առաջ: Եթե մենք մեզ Հայաստանի տեր զգայինք, իմանայինք մեր պետության ինստիտուտները մեր ժողովրդին ծառայեցնելու ձևերը, ապա նույն ձևով տեր կզգայինք նաև այդ կառույցներին ու կստիպեինք նրանց աշխատել մեզ համար: Որեվհետև նրանք հենց դրան էլ կոչված են՝ ծառայելու այդ կառույցները պահող ժողովուրդներին...
Դավիթ ջան, վաղը Դիլիջանից վերադառնալուն պես քո մոտ եմ, եղբայր...
