Ֆիլիպինների ջրահարսների լողի ակադեմիան աշխարհի առաջին ուսումնական հաստատությունն է, որտեղ, այսպես ասած, «ջրահարսության» դասեր են տալիս:
Այս հաստատությունը հիմնադրվել է 2012 թ.-ին՝ Անամի Սաենզի և Նորմեթ Պրեգոլոյի կողմից: Նրանք երկուսն էլ հուսով էին, որ իրենց նախաձեռնությունը մեծ աղմուկ կհանի և կգրավի բազմաթիվ մարդկանց ուշադրությունը: Այդպես էլ պատահեց:
Ջրահարսների լողը բավականին պարզ է. լողորդները պարզապես կրում են ջրահարսների պոչեր ու սովորում, թե ինչպես օգտագործել իրենց մկանները ջրում՝ ջրահարսների պես նրբագեղորեն լողալու համար:
Դասերը չեն անցկացվում ավանդական լողի դպրոցում: Ապագա ջրահարսներն իրենց պարապմունքներն անցկացնում են Բորակայ կղզու տարածքում:
Անշուշտ, եթե մարդ առհասարակ լողալ չգիտի, նրան առաջին իսկ պարապմունքից չեն ստիպի ջուրը մտնել ջրահարսի պոչով: Ջրահարսների լողի ակադեմիայում նախ և առաջ սովորեցնում են լողի ավանդական ոճերը, ապա միայն անցնում այսպես կոչված «ջրահարսալողին»:
Այստեղ անցկացվում են նաև ջրահարսային դայվինգի (ջրասուզորդություն) պարապմունքներ:
Այս լողի դպրոցը միայն Դիսնեյի մուլտֆիլմերի սիրահար երեխաների համար չէ: Այստեղ կարելի է հանդիպել ամենատարբեր տարիքային խմբերի պատկանող մարդկանց: Իմիջիայլոց, թեպետ սա ջրահարսների ակադեմիա է, արական սեռի ներկայացուցիչները ևս հաճախում են պարապմունքներին: Ահա երկու ժամանակակից «ջրափեսա», որոնք ակադեմիայի սաներից են:
2 ժամ տևող ներածական պարապմունքը 40 դոլար արժե: Գումարի մեջ մտնում է նաև պրոֆեսիոնալ ֆոտոսեսիան: