Իրաքում կատարվող իրադարձությունների վերաբերյալ օրեր առաջ Իրանի նախագահ Հասան Ռոուհանին հայտարարել էր, որ Իրանը «կանի հնարավոր ամեն ինչ»` Իրաքում շիաների սրբատեղիները պաշտպանելու համար: Ու այս հայտարարությունը ամբողջացրեց այն կարծիքս, որ Իրաքի շուրջ ծավալվող գործընթացները նմանվում են միջնադարի խաչակրաց արշավանքներին, երբ եվրոպական կաթոլիկ տերությունները արշավանքներ էին կազմակերպում Մերձավոր Արևելք` իբր «Տիրոջ» գերեզմանը Երուսաղեմում անհավատներից պաշտպանելու համար, բայց դրա իրական նպատակը այդ տարածքներում հաստատվելն ու այնտեղ խաչակրաց պետությունների հիմնելն էր, և կաթոլիկները քրիստոնեական պատերազմի քողի ներքո իրագործում էին սեփական աշխարհաքաղաքական ծրագրերը: Եվ այժմ` իրենց աշխարհաքաղաքական շահերից ելնելով, որոշ երկրներ` այդ թվում մեր այժմյան միակ նորմալ հարևան Իրանը, փորձում են մասնատել իրար մեջ այդ երկիրը` պատճառաբանելով իրենց կրոնական ու ազգային արժեքների պաշտպանությունը: Այս ամենը կարելի է բնորոշել մի եզրույթով` անբարոյականություն` բարոյականության քողի ներքո: Ժամանակները փոխվում են, բայց ավանդույթները` շարունակվում...
