Մինչ Ադրբեջանի տարբեր շրջանակներից ԼՂ հիմնախնդիրը ռազմական ճանապարհով լուծելու անհրաժեշտության մասին հայտարարությունները կրկին ակտիվանում են, Ադրբեջանի ԱԳ նախարար Էլմար Մամեդյարովը իտալական ԶԼՄ-ի հետ զրույցում խոսել է այն անհրաժեշտ քայլերի մասին, որոնք տարածաշրջանում երկարատև խաղաղություն և կայունություն կապահովեն:
Վերջին շրջանում, ուղղակի և անուղղակի ձևով ԼՂ հիմնախնդիրը ռազմական ճանապարհելու կարգավորելու մասին ակնարկել են Ադրբեջանի ռազմա-քաղաքական էլիտայի գրեթե բոլոր հիմնական դեմքերը, այդ թվում` երկրի նախագահ Ի. Ալիևն ու պաշտպանության նախարար Զ. Հասանովը:
Նախօրեին վերջիններիս կուռ շարքերը համալրեց նաև Ադրբեջանի սոցիալ-դեմոկրատական կուսակցության ղեկավար Արազ Ալիզադեն, ով «1նյուզ» լրատվական գործակալության հետ զրույցում անբավարար գնահատելով միջնորդ երկրների ջանքերը, հայտարարել է, որ «Ղարաբաղի հարցը կարելի է լուծել այլընտրանքային ճանապարհով` ռազմական, քանզի չկա այլ ճանապարհ, ինչը թույլ կտա Ադրբեջանին` հասնելու ցանկալի արդյունքի»:
Նախորդ` 2013 թվականի նոյեմբերի 19-ին Վիեննայում` նախագահների, ապա դեկտեմբերի 5-ին Կիևում` ԱԳ նախարարների մակարդակով կայացած հանդիպումներից հետո միջնորդները հույս էին հայտնել, որ հնարավոր կլինի պահպանել նկատվող դրական ֆոնը:
Ավելին, դրական միտումները պահպանելու ու առաջիկայում ամենաբարձր մակարդակով ևս մեկ հանդիպում կազմակերպելու նապատակով, համանախագահներն ակտիվացրեցին ջանքերը` միաժամանակ կողմերին կոչ անելով զերծ մնալ այնպիսի քայլերից ու հայտարարություններից, որոնք լրացուցիչ լարվածություն կառաջացնեն՝ առանց այդ էլ առկա անկայուն իրավիճակում:
Սակայն, ինչպես երևում է, Ադրբեջանում այդքան էլ լուրջ չեն վերաբերում ինչպես բուն գործընթացին, այնպես էլ միջնորդների հորդորներին, շարունակելով գործել այնպիսի ոճով, ինչը ավելի է խորացնում կողմերի միջև առկա վստահության դիֆիցիտն ու կողմերին հեռացնում նույնիսկ տարրական հարցերում պայմանավորվածություն ձեռք բերելու հնարավորությունից:
