Միլանում հայտնաբերվել է Լեոնարդո դա Վինչիի որմնանկարը

1in.am-ը գրում է.

Միլանի Սֆորցաների ամրոցում վերականգնողական աշխատանքների ժամանակ հայտնաբերվել է Լեոնարդո դա Վինչիի հեղինակած որմանկար, հայտնում է Corriere Della Sera-ն: 

Որմնանկարը հայտնաբերել են, այսպես կոչված, Sala della Asse սրահում, որի պատերը պատված են եղել փայտերով: 

Վերականգնողները հայտնաբերել են մեծ միագույն որմնանկար՝ նկարված փայտի ածուխով: Դրա վրա պատկերված են ծառերի հսկայական արմատներ, որոնք դուրս են գալիս պատերի միջից:

Ըստ նկարչի մտահղացման՝ սրահը պետք է նկարազարդվեր տաղավարի պես` ոլորված ճյուղերով ու զարդարված ոսկե քուղերով: Հնարավոր է` պատերին կարող են պատկերված լինել ծառեր, որոնք շրջապատում են տաղավարը: 

Հայտնաբերելով որմնանկարը՝ վերականգնողները հայտարարել են, որ այն ամբողջությամբ վերականգնելու հնարավորություն կա, սակայն դրա համար տևական ժամանակ է հարկավոր: 

Դա Վինչին Լոդովիկ Սֆորցայի պատվերով սրահի ձևավորման վրա աշխատել է 1498թ. մի քանի ամիս: Այդտեղ դուքսը ընդունում էր իր կարևոր հյուրերին: Հնարավոր է՝ նկարիչը մենակ չի աշխատել: Հայտնի չէ՝ արդյոք նրա աշխատանքն ավարտվե՞լ է, թե՞ ոչ: