Պատահական հանդիպումը մայրերին օգնել է ուղղել բժիշկների սխալը

1in.am-ը գրում է.

Արգենտինական կլինիկաներից մեկում իսկական սերիալի սցենար է զարգացել: Նույն օրը ծննդաբերած մայրերի պատահական հանդիպումն օգնել է բացահայտել բժիշկների սխալը, երբ ծնվելիս նրանք խառնել են նորածիններին: 

Սեպտեմբերի 30-ին Մարիա Մորենա Գերբենան և Վերոնիկա Տեխադին Սան-Խուանի մասնավոր կլինիկայում երկուսն էլ առողջ աղջիկներ են լույս աշխարհ բերել: 37-ամյա Մարիան, ով երկու մեծահասակ երեխաներ էլ ունի, կեսարյան հատման միջոցով է երեխային ունեցել, որից անմիջապես հետո նրան հայտնել են, որ երեխայի քաշը 3 կգ է, իսկ հետագայում երեխային մոր մոտ բերելով՝ նրան ասել են, որ նորածնի քաշը 3,7 կգ է, և որ նա բնական ճանապարհով է լույս աշխարհ եկել, տեղեկացնում է Santa Cruz Sentinel-ը:

Իրավաբան կնոջ ուղեղում այդ ամենն ուղղակի չի տեղավորվել, իսկ հետագայում նրա մայրական բնազդից ծնված կասկածները վստահության են վերածվել այն ժամանակ, երբ ճակատագրի բերումով Մարիան և Վերոնիկան հանդիպել են այն կլինիկայում, որտեղ եկել են բուժզննման: 

Կանանց զրույցի ժամանակ ի հայտ է եկել, որ նրանց երեխաների քաշերը ճշգրտորեն համընկնում են, որից հետո Մարիայի դիմումի հիման վրա քրեական գործ է հարուցվել, և դատավորը ԴՆԹ-ի փորձաքննություն է նշանակել, որի արդյունքներն էլ ապացուցել են, որ երեխաներին ծնվելիս փոխել են: 

Ծնվելուց երեք շաբաթ անց ծնողները միացել են իրենց իսկական երեխաների հետ, իսկ կլինիկայի ներկայացուցիչը խոստովանել էր, որ երեխաներին սխալմամբ են փոխել: 

Երկու տուժած ընտանիքներն էլ այժմ քննարկում են կլինիկայի դեմ հայց ներկայացնելու հնարավորությունը: