Վրաստանում նախագահական ընտրությունները կդառնան կառավարության վստահության քվե. Իվանիշվիլի

1in.am-ը գրում է.

Վրաստանում առաջիկա նախագահական ընտրությունները փաստացիորեն կդառնան կառավարության վստահության քվե: Ինչպես հաղորդում է Trend գործակալությունը, նման կարծիք է հայտնել Վրաստանի վարչապետ Բիձինա Իվանիշվիլին:

«Դա կլինի մեր մեկ տարվա աշխատանքի գնահատականը, և մենք հույս ունենք, որ մեր թեկնածուն՝ Գեորգի Մարգվելաշվիլին, կհաղթի հենց առաջին փուլում»,- ասել է նա լրագրողների հետ հանդիպմանը:

Իվանիշվիլին նշել է, որ իր կառավարությունն արել է ավելին, քան հնարավոր էր ակնկալել:

«Սակայն ապագայում մենք ևս անելու շատ բան ունենք»,- ասել է նա:

Վարչապետի խոսքերով՝ հիմնական ձեռքբերումը նախագահական ընտրություններին պատրաստվելու ընթացքն է:

«Մենք ապահովել ենք ազատ և մրցակցային ընտրություններ, որոնք համապատասխանում են եվրոպական բոլոր չափորոշիչներին, և դա մեր գլխավոր ձեռքբերումն է»,- ասել է նա և կոչ արել քվեարկել «Վրացական երազանք» կոալիցիայի թեկնածուի օգտին:

Հիշեցնենք, որ Վրաստանում նախագահական ընտրությունները կայանալու են հոկտեմբերի 27-ին: